काठमाडौं चैत, २८–
ओखलढुंगामा गाँउपालिका अध्यक्षमाथि आक्रमण भएको छ । जिल्लाको लिखु गाउँपालिकाका अध्यक्ष गोविन्द पौडेलमाथि अज्ञात समूहले आक्रमण गरेको हो । क्वार्टरमा सुतिरहेका पौडेललाई बाहिर बोलाएर मुंग्रो प्रहार गरेको हो ।
उनले भने, ‘म निवासमै सुतिरहेको थिएँ, बाहिर निस्कनुस्, जरुरी काम छ भनेर बोलाए । कोही जनता दुःख पाएर आए भन्ने ठानेर बाहिर निस्केको थिएँ,’ढोकाबाट बाहिर निस्कनासाथ मुंग्रोले आक्रमण गरे ।’
अध्यक्ष पौडेलका अनुसार लिखु गाउँपालिका ९ पोकलीबाट आएको बताउने ४ जनाको समूहले मुङ्ग्रो हानेका हुन् । पौडेलको बायाँ घुँडामा ४ टाँका लगाइएको छ भने तिघ्रा र नली खुट्टामा गहिरो चोट लागेको छ । उनको हातको कान्छी औंला फुटेको छ ।
उनको राति नै स्थानीय स्वास्थ्य संस्थामा सामान्य उपचार गराइएको र थप उपचारका लागि काठमाडौं लैजाने तयारी भइरहेको बताईएको छ । ओखलढुंगा प्रहरीले घटनाकोबारेमा थप अनुसन्धान भैरहेको बताएको छ ।
