कार्तिक २, काठमाडौँ —
राष्ट्रपति विद्यादेवी भण्डारीले आफ्नै आमा मिथिला पाण्डेबाट शुभसाइत बिहान नौ बजेर ५१ मिनेटमा वैदिक विधिपूर्वक टीका तथा प्रसाद ग्रहण गरेकी छन् ।
त्यस्तै हनुमानढोका दरबारका मूल पुजारी देवराज अर्याल र राष्ट्रपति कार्यालयका पुरोहित हेमचन्द्र ढकालबाट पनि टीका तथा प्रसाद ग्रहण गरेकी छन्।
प्रतिपदाका दिनदेखि महानवमीसम्म नवदुर्गा, कुमारी, महाकाली, महालक्ष्मी र महासरस्वतीको पूजाअर्चना तथा सप्तशती पाठ गरिएको हनुमानढोका दसैँघरबाट पूर्णकलशको जल, जमरा, तिलक र रक्षासूत्र ल्याइ वैदिक विधिपूर्वक माता नवदुर्गा भवानीको आव्हान गरी स्थापना गरिएको पूर्ण कलशको जलले राष्ट्रपतिमा अभिषेक गरिएको थियो
राष्ट्रपति भण्डारीले मूल पुरोहित, राष्ट्रपति कार्यालयका पुरोहित र अन्य ब्राह्मणलाई टीका, जमरा र दक्षिणा प्रदान गरेकी छन्। राष्ट्रपति भण्डारीले छोरी ज्वाँइ उषाकिरण र उमेश थापा तथा निशाकुसुम र अभिषेक यादव तथापरिवारका अन्य सदस्यका साथै राष्ट्रपति कार्यालयका कर्मचारी, सुरक्षाकर्मी र समाचार सङ्कलन गर्न पुगेका सञ्चारकर्मीलाई पनि टीका लगाएकी थिइन्। । त्यसअघि राष्ट्रपति भण्डारीले दीप, कलश र गणेशको पूजा गरेकी थिइन्। रासस
