काठमाडौं कात्तिक, १५–
प्रधानमन्त्री केपी ओलीको स्वास्थ्य सुध्रिँदै गएपछि अस्पतालले डिस्चार्जको तयारी थालेको छ । गएको सोमबार छातिमा संक्रमण बढेपछि अस्पताल भर्ना भएका प्रधानमन्त्री ओलीको अवस्था निरन्तर सुधार हुँदै गएको अस्पतालले जनाएको छ ।
बिहीबारको नियमित पत्रकार सम्मेलनमा प्रा. डा. उत्तम कृष्ण श्रेष्ठले भने, ‘प्रधानमन्त्रीले लगभग पूर्ण स्वास्थ्य लाभ गर्नुभएको छ भन्ने ठानेका छौं । डिस्चार्ज कहिले गर्ने भन्ने विषयमा छलफल गरेका छौं तर टुंगो लगाएका छैनौं ।’
उनले अघि भने, ‘रगतको रिपोर्ट नर्मल अवस्थामा आएको छ । छिट्टै स्वास्थ्य लाभ गरेर छिट्टै फर्कनु हुनेछ ।’
अस्पतालले विहीबार बिहान १० बजे जारी गरेको प्रेस विज्ञप्तिमा ओलीको स्वास्थ्य स्थिति सन्तोषजनक रहेको र छिट्टै सामान्य स्थितिमा फर्किने उल्लेख छ ।
गएको चार दिनदेखि प्रधानमन्त्री ओली त्रिवि शिक्षण अस्पताल परिसरभित्र रहेको मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा उपचाररत छन् । उनको उपचारमा मुटुरोग विशेषज्ञ डा. अरुण सायमी, निजी चिकित्सक डा. दिव्या सिंह शाह र छाति रोग विशेषज्ञ डा. सन्त कुमार दासको टोली खटिएको छ।
