काठमाडौं पुस, १०–
प्रहरीले राजधानीको रत्नपार्क क्षेत्रमा सार्वजनिक यातायातका यात्रुमाथि बल प्रयोग गरेको छ । मंगलबार सवारी साधन रोक्न नदिएको विरोधमा उत्रिएका यात्रुहरुमाथि प्रहरीले बल प्रयोग गरेको हो । काठमाडौं महानगरपालिका र महानगरीय ट्राफिक प्रहरी महाशाखाले राजधानीको रत्नपार्क क्षेत्रमा सवारी साधनमा ‘पिक एण्ड ड्रप’ को नीति अख्तियार गरेपछि यात्रुहरु आक्रोशित बन्दै प्रदर्शनमा उत्रिएका थिए ।
यात्रुहरु विरोधमा उत्रिएलगत्तै प्रहरीले लाठिचार्ज गरी भीडलाई नियन्त्रणमा लिएको छ । यात्रुहरु भृकुटीमण्डप क्षेत्र वरिपरि जम्मा भएर महानगर र ट्राफिक महाशाखाले जाम हटाउने नाममा प्रहरीले दुःख दिने काम गरेको भन्दै सडक छेक्दै प्रदर्शनमा उत्रिएका थिए । यात्रुहरु विरोध प्रदर्शनमा उत्रिएलगत्तै सो क्षेत्रको सवारी आवागमन अस्तव्यस्त भएको थियो ।
अहिले भने प्रहरीको हस्तक्षेपपछि भृकुटीमण्डप क्षेत्रमा सवारी आवागमन सहज भैसकेको छ ।
