काठमाडौं पुस, ११–
नेपाल दुरसञ्चार प्राधिकरणका अध्यक्ष दिगम्बर झाले पदबाट राजीनामा दिएका छन् । बुधबार प्रमुख झाले आफ्नो पदबाट राजीनामा दिएका हुन् । सूचना तथा संचार मन्त्री एवम् नेपाल सरकारका प्रवक्ता गोकुल बाँस्कोटालाई उनले आफ्नो राजीनामा पत्र बुझाएका छन् ।
गत वैशाख १५ गते झालाई पत्र पठाएर प्रशासनिक बाहेक कुनै पनि काम नगर्न सरकारले निर्देशन दिएलगत्तै सरकारले झाको नियुक्ति रद्द गरिदिएको थियो ।
तर, उनै झालाई सरकारले पुनः गत भदौ २१ गते प्राधिकरण प्रमुखमा नियुक्ति गरेको थियो । गत असार २१ गते भदौपछिका शेरबहादुर देउवा सरकारले गरेका सबै नियुक्ती खारेज गर्ने सरकारले निर्णय गरेसँगै झा पनि बर्खास्तीमा परेका थिए ।
उता, आजै बिहान मात्र बसेको नेकपा स्थायी कमिटीमा पनि झाको राजीनामा विषयले चर्चा पाएको थियो । अध्यक्ष प्रचण्डले बोल्दाबोल्दै झाको राजीनामाको विषय बैठकमा पुगेको नेकपानिकट स्रोतले बताएको छ ।
यस्तै, आजै झाले पत्रकार सम्मेलन गर्दै आफूलाई पदको लोभ नभएकोले सरकारलाई असजिलो बनाएर आफू पदमा नबस्ने घोषणा गरेका थिए ।
उनले भनेका थिए, ‘मलाई कुनै पदको लोभ छैन । काम गर्न पाए हुन्छ । मेरो कारणले यदि सम्मानीय प्रधानमन्त्री र मन्त्रीज्यूहरुलाई समेत बद्नामी हुन्छ भने म यो पद जुनसुकै बेला छोड्न पनि तयार छु ।’
‘म जागिर गरेर तलबमात्रै खाएर बस्ने मान्छे होईन, म त काम गर्ने मान्छे हुँ । म सर्भिस डेलिभर गर्न चाहन्छु । म पनि स्वतन्त्र नागरिक हुँ । मेरो पनि मान, सम्मान र सामाजिक र पारिवारिक प्रतिष्ठा छ । मेरो प्रतिष्ठामाथि आँच पुर्याउनेगरि नेताज्यूहरुले बोल्नुभन्दा अगाडि कमसेकम अध्ययन गरिहाल्नुहोस् । कसैलाई पनि आरोप लगाउँदा अन्याय नहोस् भनेर सोच्नुपर्छ,’ उनले पत्रकार सम्मेलनमा बोलेका थिए ।
यसैगरी केही दिनअघि सत्तारुढ दलका ४२ जना नेताहरुले विवादास्पद पृष्ठभूमि भएका व्यक्ति दिगम्बर झालाई राजनीतिक नियुक्ति दिइएको भन्दै आलोचना गरेका थिए । उनीहरुले पार्टी अध्यक्षद्वयलाई ज्ञापनपत्र समेत बुझाएका थिए ।
उनीहरुले बुझाएको पत्रमा दिगम्बर झा जस्ता भ्रष्टलाई राजनीतिक नियुक्ति गरेको र सरकारको सिफारिसमा राष्ट्रपतिबाट भ्रष्ट र विवादित व्यक्तिहरुलाई विभूषित गरेको भन्दै आपत्ति जनाएका थिए ।
