काठमाडौं पुस, १२–
भर्खरै महासमिति बैठक सम्पन्न गरेको नेपाली कांग्रेसमा फेरि अर्ली महाधिवेशनको चर्चा सुरु भएको छ । नेपाली कांग्रेसमा तेस्रो धारको नेतृत्व गर्दै आएका पूर्व महामन्त्री कृष्णप्रसाद सिटौलाले अर्ली महाधिवेशनको चर्चा सुरु गरेका हुन् । नेता सिटौलाले जेठभित्र अर्ली महाधिवेशन गर्न आग्रह समेत गरेका छन् । बिहिबार राजधानीमा एक कार्यक्रमको आयोजना गर्दै नेता सिटौलाले यदि जेठभित्र अर्ली महाधिवेशन गर्न नेतृत्व तयार हुनुपर्ने बताएका हुन् । उनले त्यसो हुननसके चैत्रभित्र संकमणकालीन व्यवस्था अनुसार सबै तहमा नयाँ संरचना बनाउन माग गरेका छन् ।
महासमिति बैठकले केन्द्रीय सदस्यले वडा तहबाटै निर्वाचित हुनुपर्ने माग गरेको भन्दै सिटौलाले महासमितिको सुझावलाई समेटेर केन्द्रीय समितिले विधान पारित गर्ने बताए । नयाँ विधान संघीय संरचना अनुसार बनाइएको दावी गर्दै सिटौलाले विधानमा सबै पदाधिकारी निर्वाचित हुने व्यवस्था गरिएको जानकारी दिए ।
पुरानो अनुभवको आधारमा सभापतिले पदाधिकारी मनोनयन गर्न नसकेको कारण निर्वाचित हुने व्यवस्था गरिएको उनको भनाइ छ ।
सबै पदाधिकारी निर्वाचित हुनुपर्दा चाकडी, चाप्लुसी र पैसाको प्रभाव कम हुने विश्वाससमेत नेता सिटौलाले गरेका छन् ।
महासमिति वैठकको उपलब्धीको रुपमा संघीय संरचनाको विधान आएको उनले बताए । उनले महासमिति अव्यवस्थापन बीचको व्यवस्थापनको नतिजा हो भनेका छन् ।
पछिल्लो समय कांग्रेसले खेलेको भूमिकालाई लिएर नेता सिटौलाले भने, ‘सत्ता निरंकुश बन्दै जांदा कांग्रेसको विपक्षी भुमिका संसद र सडकमा कमजोर भयो ।’
उनले काँग्रेस चुप लागेर बस्न नहुने भन्दै सरकारका गलत कामको भण्डाफोर गर्न तयार हुन पनि सबै काँग्रेस नेता तथा कार्यकर्तालाई आग्रह गरेका छन् ।
नेता सिटौलाले नेकपाका अध्यक्ष पुष्पकमल दाहाल प्रचण्डले संसदमा दिएको अभिव्यक्तिले लोकतन्त्रको सीमा नाघेको टिप्पणीसमेत गरेका छन् ।
