काठमाडौं पुस, २५–
राष्ट्रिय चिकित्सा शिक्षा विधेयक २०७५ पारित भएको छ । आज बसेको संसदको शिक्षा तथा स्वास्थ्य समितिको बैठकले उक्त विधेयक बहुमतले पारित गरेको हो ।
विधेयकको पक्षमा सत्तारुढ दलका १४ जना सांसदले मत दिएका थिए । त्यस्तै विपक्षमा प्रतिपक्षका ४ जनाले मत दिएका थिए । विपक्षमा गगन थापा, उमाकान्त चौधरी, मान बहादुर विक र नमिता चौधरीले फरक मत राखेका थिए ।
प्रतिवेदन पारित भएपछि समिति सदस्य तथा कांग्रेस सांसद गगन थापाले भने ‘सरकारले सहमति पालना गर्न नसक्ने भए किन केसीसँग सम्झौता गरेको ? सरकारले केसीसँगको सम्झौता कार्यान्वयन गरेन।’
यो विधेयक पारित भएसँगै सरकार र प्राध्यापक डा. गोविन्द केसीबीचको सम्झौता कार्यान्वयन हुने न्यून सम्भावना छ ।
संसद्को शिक्षा तथा स्वास्थ्य उपसमितिमा सोमबार राष्ट्रिय चिकित्सा शिक्षा विधेयक प्रतिवेदनमाथि छलफलक्रममा नेकपा सांसदहरूले केसीसँग भएको सम्झौता हुबहु राख्न नसकिने बताएका थिए । उपसमितिले बहुमतबाट पारित गरेको प्रतिवेदन सोमबार समिति बैठकमा पेस गरिएको थियो ।
यसअघि उपसमितिको प्रतिवेदनप्रति असहमति जनाउदै डा. गोविन्द केसीले अनसन बस्ने घोषणा गरेका थिए । तर, समिति सभापति घर्तीले संशोधन गर्न सकिने भन्दै केही दिन समय मागेपछि उनले आजसम्म अनसन स्थगन गरेका थिए । डा. केसी अनसनका लागि इलाम पुगिसेका छन् । विधेयक पारित भएपछि डा. केसीको प्रतिक्रिया के आउछ र उनी के गर्छन हेर्न बाँकी छ ।
