बुटवल माघ, १२–
प्रदेशैपिच्छै सरकारविरुद्ध प्रदर्शन गर्दै आएको कांग्रेसको भातृसंगठन नेपाल तरुण दलले आज प्रदेश नम्बर ५ को राजधानी बुटवलमा प्रदर्शन गरेको छ । शुक्रबार मात्रै प्रतिपक्षीको अवरोधकाबीच राष्ट्रिय चिकित्सा शिक्षा विधेयक संसदबाट बहुमतले पारित भएको अर्को दिन तरुण दलले बुटवलमा सरकारविरुद्ध भव्य प्रदर्शन गरेको हो । प्रदर्शनको अघिल्लो दिन साँझ बुटवलका मुख्य सडक र चोकमा तरुण दलले राँके जुलुस समेत प्रदर्शन गरेको थियो । आज प्रदेश ५ का सबै जिल्लाका तरुण नेतासहित बुटवलको चौराहामा विरोध सभा गरेको हो ।
बुटवलको ट्राफिक चोकबाट सुरु भएको विरोध र्याली चौराहामा पुगेर सभामा परिणत भएको थियो । सभालाई सम्बोधन गर्दै तरुण दलका केन्द्रीय अध्यक्ष जीतजंग बस्नेतले सरकार अधिनायकवादी बनेको र प्रतिपक्षको आवाजलाई दबाउन खोजेको आरोप लगाए ।
उनले देशभरका तरुणहरु रहरले नभई बाध्यताले सडकमा उत्रिनुपरेको बताए । बलात्कारीको संरक्षण गर्ने, भ्रष्टाचारी जन्माउने र महंगीको मारमा नेपाली जनतालाई पिल्साउने सरकार अब धेरै दिन नटिक्ने उनको दाबी थियो ।
त्यस्तै, रूपन्देही तरुण दलको नेतृत्वमा बुटवलमा भएको विरोध सभामा प्रदेश ५ का अधिकांश जिल्लाका जिल्ला नेता सहभागी भएका थिए । रुपन्देहीका जिल्ला अध्यक्ष सोमबहादुर गुरुङले कम्युनिष्ट सरकारको विरुद्धमा दैनिक विरोधका कार्यक्रम सञ्चालन गर्ने बताए ।
बाँकेको सुशिल कोइराला क्यान्सर अस्पताल र तनहुँको जीपी कोइराला श्वासप्रश्वास केन्द्रलाई संघ मातहत नराखेपछि आक्रोशित बनेको कांग्रेसले विधेयक पारित भएसँगै देशभर विरोध सुरु गरेको हो । यसअघि प्रदेश नम्बर १ को विराटनगर, २ को जनकपुर, ३ को हटौंडा र ४ को पोखरामा तरुण दलले सरकार विरोधी प्रदर्शन गरिसकेको छ ।
नेपाली कांग्रेस रूपन्देहीका सभापति अब्दुल रज्जाकले सरकारले विधेयक पारित गरेको दिन माघ ११ लाई कांग्रेसले कालो दिनको रुपमा मनाउने बताए ।
