मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

मन्त्रीको दबाबमा कारबाहीमा परेका इन्स्पेक्टरलाई आकर्षक जिम्मेवारी



काठमाडौं माघ, २५–
कारबाहीमा परेको प्रहरी निरीक्षकलाई आकर्षक ठाउँमा पोस्टिङ दिएको रहस्य बाहिरिएको छ । प्रहरी प्रधान कार्यालयले धनुषास्थित इलाका प्रहरी कार्यालय, सखुवा, महेन्द्रनगरमा नसियत पाएका प्रहरी निरीक्षक अरुण कुशवाहलाई इञ्चार्जको जिम्मेवारी दिइएको हो ।

कुशवाहलाई भौतिक पूर्वाधार तथा यातायात मन्त्री रघुविर महासेठको जोडबलमा मकवानपुरको औद्योगिक क्षेत्र पशुपतिनगरस्थित इलाका प्रहरी कार्यालयको इञ्चार्ज बनाईएको हो ।

महेन्द्रनगरमा रहँदा कुशवाहले ११ मंसिरमा नसियत पाएका थिए । जिल्लाबाट अनुगमनमा खटिएको टोलीसँग दुर्व्यवहार र सही ढंगले कार्यसम्पादन नगरेको आरोपमा उनीमाथि कारबाही भएको थियो ।

संगठनको आचरण र मर्यादा विपरित काम गरेको आरोपमा नसियत दिइएलगत्तै उनलाई काजमा जिल्ला प्रहरी कार्यालय, ओखलढुंगा पठाइएको थियो । तर, उनी अटेर गरेर प्रहरी मुख्यालयमै हाजिर गरेर बसे । अहिले मकवापुरको इप्रकाको नेतृत्व पाएका छन् ।

जिल्ला प्रहरी कार्यालय, मकवानपुरका एक उच्च अधिकारीले अनलाइनखबरसँग कुरा गर्दै केही साताअघि उनलाई त्यहाँ प्रहरी प्रधान कार्यालयले खटाएको पुष्टि गरे । ती अधिकारीका अनुसार पशुपतिनगरका पूर्वप्रमुखले अनिवार्य अवकाश पाएपछि त्यहाँको दरबन्दी खाली थियो ।

केन्द्रीय प्रहरी प्रवक्ता एसएसपी उत्तमराज सुवेदीले भने पशुपतिनगर प्रहरी निरीक्षकलाई पुरस्कृत गर्ने खाल्को पोस्टिङ नभएको दाबी गरे ।

प्रकाशित मिति : २५ माघ २०७५, शुक्रबार  ६ : ५३ बजे