चितवन माघ, २९–
नेपाली कांग्रेसका वरिष्ठ नेता रामचन्द्र पौडेलले दुई तिहाइको कम्युनिष्ट सरकारले चुस्त दुरुस्त रुपमा फटाफट काम गर्नुको साटो जनताको अपेक्षामा निरासा भर्ने मात्रै काम गरेको आरोप लगाएका छन् । मंगलबार नेपाल प्रेस युनियनले चितवनमा आयोजना गरेको पत्रकार सम्मेलनमा बोल्दै नेता पौडेलले कम्युनिष्ट सरकार गतिहीन देखिएको आरोप लगाए ।
पौडेलले भने, ‘गतिविधि भन्नुपर्दा गति पनि छैन, विधि पनि छैन, मनलाग्दी गर्छ ।’ उनले प्रतिपक्ष चुस्त हुँदै सरकारको कामको निगरानीमा लागेको पनि बताए ।
फरक प्रसङ्गमा नेता पौडेलले पार्टीको केन्द्रीय समितिका पदाधिकारी र सदस्य वडा तहवाटै निर्वाचित भएर आउनुपर्ने प्रष्ट पारे । महासमितिले निर्णय गरिसकेको भन्दै उनले केही साथीले वडा तहबाट चुनाव लड्न किन जाने भनेको भए पनि त्यो सम्भावना नरहेको बताए ।
नेपाल विद्यार्थी सङ्घको केन्द्रीय समिति नरहेकाले पार्टीको विधानअनुसार नयाँ व्यवस्था गर्ने उनको भनाइ थियो । केन्द्रीय समितिले आफ्नो दायित्व पूरा गर्न नसकेको उल्लेख गर्दै नेता पौडेलले यस्तो अवस्थामा विधानमा उल्लेख भएअनुसारको व्यवस्था गरिने प्रष्ट बताए ।