काठमाडौंसहित देशका धेरैजसो ठाउँमा पानी पर्ने, पहाडी तथा हिमाली भेगमा हिउँ पर्ने सम्भावना



काठमाडौं फागुन, १९–
जल तथा मौसम पूर्वानुमान महाशाखाले आजदेखि देशभरको मौसम सामान्य बदली रहने जनाएको छ । मौसमविद् राजु प्रधानाङगले पश्चिमी वायुको प्रभावका कारण अबको तीन दिन देशभरकै मौसम सामान्य बदली भई पानी पर्ने सम्भावना रहेको जनाए ।
मौसमविद् प्रधानाङ्गका अनुसार काठमाण्डौसहित देशका धेरैजसो ठाउँमा आइतबार दिउँसो पानी पर्ने सम्भावना रहेको छ भने उच्च पहाडी तथा हिमाली भेगमा हल्का हिमपातको समेत सम्भावना रहेको छ ।

सोमबार र मंगलबार पनि देशको धेरैजसो ठाउँको मौसम बद्ली भई पानी पर्ने सम्भावना रहेको छ, तर ठूलो पानी पर्ने अथवा लगातार पानी पर्ने सम्भावना भने नरहेको मौसमविद् प्रधानाङगले बताए ।

यो वर्ष पश्चिमी वायु लगातार रुपमा नेपाल भित्रिइरहेको छ । यसैको प्रभावले केही दिनमा नै मौसम बदलिरहेको छ । लगातार रुपमा भित्रिरहेको पश्चिमी वायुका कारण धेरै लामो समयसम्म घाम लाग्न सकेको छैन । महाशाखाका अनुसार यो वर्ष हिउँदे वर्षा पनि औसतभन्दा बढी भएको छ ।

प्रकाशित मिति : १९ फाल्गुन २०७५, आइतबार  ३ : ०० बजे