काठमाडौं फागुन, २३–
विप्लव नेतृत्वको नेपाल कम्युनिस्ट पार्टी(नेकपा) को बन्दाका राप्ती कारण ती जिल्लाको जनजीवन प्रभावित भएको छ ।
विना कारण प्रहरी प्रशासनले आफ्ना नेता–कार्यकर्ता गिरफ्तार गरेको विरोधमा विप्लव नेतृत्वको राप्ती ब्यूरोले दाङ, सल्यान, रुकुम, प्यूठान र रोल्पा बन्दको आह्वान गरेको हो । आजको बन्दले ५ वटै जिल्लाको जनजीवन प्रभावित बनेको छ ।
बन्दका कारण रोल्पाका लामो तथा छोटो दूरीका सवारीसाधन चलेका छैनन् । राससका अनुसार, त्यहाँका बजार, कलकारखाना र विद्यालय कलेज पूर्णरूपमा बन्द रहेका छन् ।
बिहानी कक्षाका लागि उच्चमावि र कलेज गएका विद्यार्थी फर्किएका छन् । सदरमुकाममा रहेका तरकारी पसल, होटल र औषधि पसल भने खुला रहेका छन् ।
प्रहरीले दाङ जिल्ला सचिवालय सदस्य प्रदीप वली, ईश्वरी पाण्डे र जिल्ला सदस्य रुद्र वलीलाई तुल्सीपुरबाट शहीद सम्मान कार्यक्रमस्थलबाट गिरफ्तार गरेको सो पार्टीले जनाएको छ । यसैगरी रोल्पा जिल्लाबाट समेत दलित मुक्ति मोर्चाका केन्द्रीय सदस्य टीकाराम परियार, पूर्वअध्यक्ष लालबहादुर सुनार र अर्का कार्यकर्ता नृपेन्द्र सेनलाई पक्राउ गरेको जनाएको छ । यी सबै नेता–कार्यकर्तालाई विनाशर्त रिहा गर्नुपर्ने विप्लव नेकपाको माग रहेको छ ।
