बुटवल फागुन, २८–
नेपाली कांग्रेसका वरिष्ठ नेता रामचन्द्र पौडेलले सरकार र सीके राउतबीचको सम्झौताले सरकारको नियतमाथि अनेक प्रश्न उठिरहेको बताएका छन् । मंगलबार बुटवलमा प्रेस युनियनले आयोजना गरेको पत्रकार सम्मेलनमा बोल्दै नेता पौडेलले राउतसँगको सम्झौताले राष्ट्रिय अखण्डतामाथि नै गम्भिर प्रहार गरेको आरोप लगाए ।
पौडेलले भने, ‘सरकारले सीके राउतसँग गरेको ११ बुँदे समझदारी अपरिपक्व छ, सिकेसँग गलत सम्झौता गरेर सरकार आफैंले देशको अखण्डतामाथि प्रहार गरेको छ ।’
उनले पृथकतावादी आन्दोलन सकिएको भनेर प्रधानमन्त्रीले दिएको अभिव्यक्तिको पनि चर्को आलोचना गरे । पौडेलले भने, ‘प्रधानमन्त्रीले पृथकतावादी आन्दोलन सकियो भन्नु दुश्प्रचार हो ।’
त्यस्तै, नेता पौडेलले वाइडवडी काण्डमा तत्कालीन पर्यटन मन्त्री रवीन्द्र अधिकारी निर्दोष रहेको भन्ने प्रधानमन्त्रीको भनाइप्रति पनि असन्तुष्टि जनाए ।
अख्तियारलाई समेत चुनौती दिने गरी प्रधानमन्त्रीबाट आएको अभिव्यक्ती ढाक छोप गर्ने प्रपञ्च भएको पौडेलको भनाइ छ ।
आधिकारिक रुपमा छानविन गर्नुपर्नेमा सरकार दूधको साक्षी बिरालो जस्तै बनेको उनले बताए ।
उनले छानबिन समितिले सत्यतथ्य बाहिर ल्याउनेमा पनि शंका व्यक्त गरे । ‘छानविन आयोगभन्दा पनि ढाकछोप आयोग बनाएर पर्दा हाल्ने काम मात्रै भएको छ’, निष्पक्ष छानबिनमाथि शंका व्यक्त गर्दै पौडेलले भने ।
कार्यक्रममा उनले सरकारको मूल्यांकन गर्न पनि भ्याए । सुनकाण्डदेखि चिनी काण्डसम्मका उदाहरण प्रस्तुत गर्दै उनले यसलाई भ्रष्टाचार मौलाएको प्रमाणका रुपमा प्रस्तुत गरे ।
विप्लव नेकपालाई बेलैमा सम्बोधन गर्नुको विकल्प नभएको भन्दै उनले अबिलम्ब वार्तामा बोलाउन माग गरे । ‘सर्पको खुट्टा सर्पले देख्छ, अबिलम्ब विप्लवजीसँग वार्ता गरे ।’
