बुटवलको कालिकानगरमा शंकास्पद बस्तु फेला

बुटवल फागुन, ३०–
विप्लव नेतृत्वको नेपाल कम्युनिस्ट पार्टीले गरेको बन्दका कारण आज देशैभरको जनजीवनमा प्रभाव परेको छ । कपिलवस्तुको शिवराज ९ मा भएको घटना र देशका बिभिन्न स्थानबाट आफनो पार्टीका नेता कार्यकर्ता पक्राउको बिरोधमा विप्लव नेतृत्वको नेकपाले आज बन्द आह्वान गरेको हो ।
सम्भवतः सरकारले विप्लव समूहमाथि प्रतिबन्ध लगाएकाले होला विप्लवका कार्यकर्ताहरु सडकमा देखिएका छैनन । तर, सार्बजनिक यातायात तथा उद्योग व्यवसाय बन्द भएका छन् ।
बिहानी सत्रमा चल्ने शिक्षण संस्था चलेका छैनन । बुटवलको कालिकानगरमा शंकास्पद बस्तु फेला परेको छ । बुटवल बेलहिया सडक खण्डको कालिका चोकमा डिभाईडर माथि कालो रङ्गको संकास्पद बस्तु भेटिएपछि सर्वसाधारण जनता त्रसित भएका छन् ।

सुरक्षाकर्मी सडकमा तैनाथ भएका छन् । बुटवल, भैरहवा, पाल्पा, अर्घाखाँची लगायतका स्थानबाट लामो छोटो दुरीमा चल्ने सार्बजनिक यातायात छुटेका छैनन् । मोटरसाईकलहरु भने चलेका छन् ।