काठमाडौं फागुन, ३०– स्वतन्त्र मधेशको माग गर्दै आएको सीके राउत नेतृत्वको स्वतन्त्र मधेश गठबन्धनको राष्ट्रिय परिषद् बैठक बस्ने भएको छ। परिषद् बैठक आगामि चैत ४ र ५ गते जनकुपुरमा बस्ने मिति तय गरिएको छ ।
अघिल्लो शुक्रबार मात्रै सरकारसँग ११ बुँदे राजनीतिक सहमति गरी मूलधारको राजनीतिमा फर्किएका राउतले गठबन्धनको राष्ट्रिय परिषद् बैठक बोलाएका हुन्।
गठबन्धनले सरकारसँग गरेको सम्झौतालाई ऐतिहासिक सफलता र विजय भएको बताउँदै यसपछिको रणनीति तय गर्न बैठक डाकेको बुझिएको छ ।
राष्ट्रिय परिषद् बैठकमा सामेल हुने सबै पार्टी सदस्यलाई चैत ४ गते सोमबार बिहान ७ बजे भित्रै कार्यक्रम स्थलमा आउन सूचित गरिएको छ।
सरकारसँग सहमति गरेको दोस्रो दिनमै गृहनगर जनकपुर पुगेका राउतको गठबन्धनका नेताकार्यकर्ताले भव्य स्वागत गरेका थिए।
सीकेसँगको सहमतिसँगै सरकारको चर्को आलोचना भइरहेको छ । सहमतिपछि मधे शझरेका राउतको स्वागतमा सहमति विपरित पूरानै झण्डा र ब्यानर प्रयोग गरेको भनेर आलोचना भइरहेको छ । सहमतिप्रति मिडिया, नागरिक समाज र मधेशी जनताको प्रतिक्रिया नियालीरहेको सीकेका नेता कार्यकर्ताले बताएका छन् । त्यही कुराको विश्लेषण र छलफल गरेर आगामी दिशा तय हुने उनीहरुको भनाइ छ । स्वतन्त्र मधेशको माग छोडेको भन्ने चर्चा चलिरहेकाबेला मधेशी जनतालाई धोका नदिएको उनीहरुले बताउने गरेका छन् । सीके निकट एक नेताले भने, ‘स्वतन्त्र मधेशको माग यथावतै छ, रणनीति अनुसार सम्झौता भएको भनेर गठबन्धनभित्र सर्कुलर गरिएको छ ।’
