काठमाडौं चैत, १–
जिल्ला प्रशासन कार्यालय, पर्साले छिमेकी जिल्ला मकवानपुरमा बर्डफ्लु भेटिएपछि सतर्कता अपनाउन आग्रह सबैमा गरेको छ । मकवानपुरमा बर्ड फ्लु भेटिएको पुष्टि भएपछि प्रमुख जिल्ला अधिकारी नारायणप्रसाद भट्टराईले सरोकारवालालाई सतर्कता अपनाउन आग्रह गरेका हुन् ।
छिमेकी जिल्लामा बर्डफ्लू भेटिएपछि कम्तीमा पर्सा पनि जोखिममा पर्न सक्ने भएकाले उत्पादन गर्ने, बिक्री गर्ने र खाने सबैले सतर्कता अपनाउनुपर्ने प्रमु जिल्ला अधिकारी भट्टराईको भनाइ छ । यसबारे प्रसाशनले बैठक बसेर आबश्यक तयारी गर्ने उनले बताए ।
मकवानपुरको हेटौंडा उपमहानगरपालिका–७, नागस्वतीस्थित कुलप्रसाद चौलागाईको कर्मसियल लेयर्स फर्ममा पालिएको कुखुराको नमूना परीक्षणका क्रममा बर्डफ्लु भेटिएको हो । त्यसपछि यसको नियन्त्रणका लागि जिल्ला प्रशासन कार्यालय, मकवानपुरले फर्मलाई केन्द्र बिन्दु मानेर वडा नं. ६ र ७, पश्चिममा वनदेवी मन्दिर जाने बाटोको पूर्वी सीमाना, उत्तरमा वनदेवी दुग्ध उत्पादक सहकारी संस्था भवनको सीमानाको बाटो र दक्षिणमा अग्राठे मन्दिरको उत्तरी सीमाना परिधिभित्रको क्षेत्रमा कुखुरा, अण्डा र सुलीको निकासी रोकेको छ ।
वर्डफ्लूको संक्रमण फैलन नदिन सतर्कता अपनाइएको जिल्ला प्रशासन कार्यालय, मकवानपुरका प्रमुख प्रशासकीय अधिकृत गुणराजप्रसाद न्यौपानले जानकारी दिए ।
खुल्ला सीमाका कारण पर्सा जिल्ला बर्डफ्लूको जोखिममा छ । भारतबाट पंक्षीजन्य वस्तु आयातमा प्रतिबन्ध लगाइएको भए पनि सस्तोमा पाइने हुँदा चोरी तस्करीबाट कुखुरा, चल्ला र अण्डा आउने गरेको छ । विशेष गरी पर्साको जानकीटोला, भिश्वा, इनर्वालगायत नाकाबाट अवैध रुपमा कुखुरा, चल्ला र अण्डा तस्करी हुने गरेको कुखुरा व्यवसायीहरु बताउँछन् । पर्सा जिल्लामा ४ सयको हाराहारीमा कुखुरा व्यवसायी छन् । मकवानपुर, चितवनबाट लेयर्स कुखुरा, अण्डा र चल्ला आउने गरेको छ ।
कुखुरा व्यवसायी संघ, पर्साका अध्यक्ष मुन्ना चौरसियाले मकवानपुरमा बर्डफ्लूको संक्रमण देखिएपछि काठमाडौं जाने कुखुरा बर्दिबास हुँदै पठाउन थालिएको जानकारी दिए ।
