जनकपुर चैत, १–
सर्लाहीको भ्रमण पूरा गरी पूर्वराजा ज्ञानेन्द्र शाह जनकपुर पुगेका छन् । बिहीबार सर्लाहीको मलंगवास्थित दूर्गा भगवतीको मन्दिरमा पूजा गरेका पूर्वराजाले आज अपरान्ह ४ बजे जनकपुर मन्दिरमा पूजाआजा गर्ने कार्यक्रम रहेको पूर्वराजा निकट स्रोतले जनाएको छ ।
बिहिबार दूर्गा भगवतीको मन्दिरमा दर्शन गर्न पुगेका ज्ञानेन्द्रलाई स्थानीयले स्वागत गरेका थिए । उनको स्वागतमा फूलमाला बोकेर उल्लेख्य सहभागीको उपस्थिति रहेको थियो ।
त्यस्तै ज्ञानेन्द्रको शुक्रबार जनकपुरस्थित जानकी मन्दिरमा पूजाआजा गर्ने कार्यक्रम तय भएको छ । पूर्वराजाले पूजाआजा गर्ने भएपछि जनकपुरको सुरक्षा व्यवस्था कडा पारिएको छ ।
त्यस्तै, भोलि पूर्वराजा ज्ञानेन्द्रको उदयपुर जाने कार्यक्रम छ । उनले उदयपुरको गाइघाटस्थित राधाकृष्ण मन्दिरको दर्शन गर्नेछन् । उनी उदयपुर जनकपुरबाटै जाने छन् । त्यस्तै आइतबार पूर्वराजा सप्तरीको चखडा भगवतीको दर्शन गर्न जाने कार्यक्रम रहेको छ । तीनदिनदेखि जनकपुरमा रहेका पूर्वराजा ज्ञानेन्द्रको यो भ्रमण केवल तिर्थाटनका लागि मात्रै भएको उनका समर्थकहरुले बताउने गरेका छन् ।
उनी जनकपुरस्थित सीताचरण होटलमा बसेका छन् । पूर्वराजा निजी सवारीमार्फत नै सर्लाही, उदयपुर र सप्तरी जाने कार्यक्रम छ । यद्यपि, उनको भ्रमण, सीके राउतसँगको ११ बुँदे सम्झौता, राजपा सरकारबाट बाहिरिनु तथा विप्लव समूहलाई सरकारले प्रतिबन्ध लाउनुलाई धेरैले अर्थपूर्ण रुपमा लिएको पाईन्छ ।
