पाँचौ महिला साफ च्याम्पियनसिप अन्तर्गत नेपाल समूह ‘ए’ को विजेताको रुपमा सेमिफाइनलमा प्रवेश गरेको छ।
शनिबार विराटनगरको सहिद रंगशालामा बंगलादेशलाई ३–० गोलले पराजित गरेर समूह विजेता बनेको हो । पराजयसँगै बंगलादेश समूह उपविजेतामा सीमित बनेको छ।
बंगलादेशकी मासुरा प्रभिनले आफ्नै पोस्टमा गोल गरेपछि शनिबार नेपालले खेलको छैटौं मिनेटमा अग्रता लिएको थियो । २३ मिनेटमा सावित्रा भण्डारीले नेपालको अग्रता दोब्बर पारिन्। उनको यो २४औं अन्तर्राष्ट्रिय गोल हो।
नेपालले अघिल्लो खेलमा भुटानमाथि ३–० को जित निकालेको थियो। यस्तै बंगलादेशले पनि भुटानमाथि २–० को जित निकालेको थियो। त्यससँगै भुटान बाहिरिएको थियो भने नेपाल र बंगलादेश एक खेलअघि नै सेमिफाइनलमा पुगेका थिए।
