महोत्तरी चैत, ३–
बर्दिवास महोत्सवमा प्रमुख अतिथि को हुने भन्ने चर्को विवाद उत्पन्न भएको छ । महोत्तरीको बर्दिवासमा हुने दोस्रो बर्दिवास महोत्सवमा प्रमुख अतिथि आफ्नो पार्टीको नेता हुनुपर्ने सत्तारुढ नेपाल कम्युनिस्ट पार्टीको विवादले तनाव उत्पन्न भएको हो ।
चैत ८ देखि १८ गतेसम्म बर्दिबास उद्योग वाणिज्य संघको आयोजनामा हुनलागेको महोत्सव प्रदेश २ का मुख्यमन्त्री लालबाबु राउतबाट उद्घाटन गर्ने निर्णय भएकोमा नेकपाले आफ्ना नेतालाई प्रमुख अतिथि बनाउन माग गरेको हो । मुख्यमन्त्रीलाई निमन्त्रणा पनि पठाइसकेको आयोजकले जनाएको छ ।
यद्यपी मुख्यमन्त्री तथा मन्त्रिपरिषद कार्यालयले महोत्सवमा मुख्यमन्त्री सहभागी हुने वा नहुने औपचारिक जानकारी गराएको छैन ।
यता जिल्लाका नेकपा नेताहरुले भने आफ्नो पार्टीका नेतालाई प्रमुख अतिथि बनाउनुपर्ने भन्दै दबाव दिएका छन् । उनीहरुले आफूहरुसँग सल्लाह नगरी प्रमुख अतिथि तोकिएको भन्दै उद्योग वाणिज्य संघको विरोध जनाएका छन् । उनीहरुले नेकपा नेताहरु शिक्षा, विज्ञान तथा प्रविधिमन्त्री गिरिराजमणि पोखरेल, राष्ट्रियसभा उपाध्यक्ष शशीकला दाहाल वा स्थानीय तहमा निर्वाचित नेकपा प्रतिनिधिबाट महोत्सव उद्घाटन गराउनुपर्ने अडान राखेका छन् ।
नेकपाले प्रमुख अतिथि परिर्वतन गर्न वा महोत्सव सार्न आयोजकलाई दवाव दिएको छ । नेकपाकै अडानका कारण आइतबार बसेको सर्वदलीय बैठक विना निश्कर्ष सकिएको छ ।
संघका अध्यक्ष प्रहलाद क्षेत्रीले महोत्सव सम्पूर्ण बर्दिवासबासीको प्रतिष्ठाको बिषय भएको भन्दै प्रमुख अतिथि फेर्ने वा महोत्सव सार्ने विषयले राजनितिक रुपमा राम्रो सन्देश नजाने बताए ।
