काठमाडौं चैत, १५–
प्रधानमन्त्री केपी शर्मा ओलीले लगानी सम्मेलनको उदघाटन गरेका छन् । सरकारले विदेशी लगानी भित्र्याउन आयोजना गरेको सम्मेलनको शुक्रबार काठमाडौंको होटल सोल्टीमा आयोजित विशेष समारोहकाबीच धानमन्त्री ओलीले उदघाटन गरेका हुन् ।
सम्मेलनमा अर्थमन्त्री युवराज खतिवडाले स्वागत मन्तव्य राख्दै सहभागीहरुलाई स्वागत गरेका छन् । सम्मेलनमा बोल्दै उनले राजनीतिक संक्रमण अन्त्य गर्दै नेपाल समृद्धिको यात्रामा अघि बढेकाले हातेमालो गरेर अघि बढ्न लगानीकर्तालाई आग्रह गरे । प्रधानमन्त्रीले राजनीतिक संक्रमणकाल सकिएकाले ढुक्क भएर लगानी गर्न लगानीकर्तालाई आग्रह गरेका छन् । उनले भने, ‘नेपाल लगानीको भर्जिन ल्यान्ड हो । यहाँ कुनै असुरक्षा छैन । ढुक्क भएर लगानी गर्नुस्, सबै जिम्मा सरकारले लिन्छ ।’
उदघाटन समारोहमा बोल्दै मन्त्री खतिवडाले सम्मेलन लगानी तथा आपसी अनुभव आदानप्रदानका लागि महत्त्वपूर्ण हुने विश्वास व्यक्त गरे ।
सम्मेलनमा स्वदेशी तथा विदेशी गरी झण्डै १ हजार लगानीकर्ताको उपस्थिति रहेको छ । विभिन्न ४० देशहरुबाटमात्रै ६ सय भन्दा बढी लगानीकर्ताको सम्मेलनमा सहभागी भएका छन् ।
सम्मेलनमा लगानीका लागि निजी क्षेत्रको तर्फबाट २७ समेत गरी सरकारले ७७ वटा परियोजनाहरु प्रस्ताव गरिदैछ । उद्घाटन शत्र पछि हुने विषयगत शत्रहरुमा ति परियोजनाहरुमा लगानीका विषयमा छलफल हुने बोर्डले जनाएको छ ।
