गुल्मी चैत, १६–
नेपाली कांग्रेसका शीर्ष नेताहरु शनिबार गुल्मीमा एकसाथ कांग्रेसलाई बलियो बनाउन सहमत भएका छन् । नेपाली कांग्रेस गुल्मीको प्रथम जिल्ला सम्मेलनको उद्घाटन गर्न कांग्रेसका शीर्ष नेताहरु एकपैटक गुल्मी पुगेका हुन् । कांग्रेस गुल्मीका प्रथम जिल्ला सम्मेलनको उद्घाटन गर्दै पार्टी सभापति शेरबहादुर देउवाल मुलुकमा दुई तिहाईको सरकारले हत्या, हिंसा र बलात्कारबाहेक केही गर्न नसकेको आरोप लगाए । बलात्कारी र भष्ट्राचारीलाई संरक्षण गर्दैमा सरकारलाई काम गर्ने फुर्सद नभएको सभापति देउवाको आरोप थियो । पूर्वप्रधानमन्त्री समेत रहेक देउवाले कम्यूनिष्टका सस्ता नाराबाट नेपाली जनता झुक्किएको बताउँदै कांग्रेसको विचार र सिद्धान्त लिएर गाउँ पुग्ने बताए ।
सभापति देउवाले विचारहीन कम्युनिस्ट र एजेण्डा बिनाको केपी ओली सरकार प्रचारमै सिमित भएकाले भ्रममा नपर्न कार्यकर्तालाई आग्रह गरे । सोही कार्यक्रमलाई सम्बोधन गर्दै कांग्रेसका वरिष्ठ नेता रामचन्द्र पौडेलले भष्ट्राचारको जगमा उभिएको सरकारले समृद्धिको आधार खोज्नु मुर्खता भएको बताए । उनले भने, ‘भ्रष्टचार गर्दिन र गर्न दिन्न भन्ने केपी ओली अहिले अख्तियार तर्साउने खेलमा लागेका छन् । ’
‘वाइडबडीको प्रमाण संसद र समितिमा छ, ओलीले कमिशनकै लागि सहेर बसेका छन,’ नेता पौड्यलले भने, ‘ऐन सेल र बुढिगण्डकीको जलविद्युतमा बार्गेनिङ्ग चलेको छ ।
’
सोही कार्यक्रमलाई सम्बोधन गर्दै महामन्त्री डा शशांक कोइरालाले पार्टीको विचार, सिद्धान्त र कार्यकर्ता एकजुट भए पनि भ्रमले निर्वाचनमा कांग्रेस पछि परेको बताए । अब प्रमुख काम पार्टी निर्माण र सरकारको खबरदारी भएकाले अर्को निर्वाचनमा दुई तिहाई मत प्राप्त गर्ने बताएका थिए । उनले सडक, विश्व विद्यालय र मेडिकल कलेज स्थापना गर्ने कांग्रेस भए पनि त्यसको जस नेकपाको सरकार र नेताले लिएको बताए ।
कांग्रेसका सह–महामन्त्री प्रकाश शरण महतले अहिलेको सरकार नाफा कमाउने कम्पनी भएको टिप्पणी गरे । उनले सरकारले विज्ञापनमार्फत कांग्रेसले गरेका कामको प्रचार गरी नाफा कमाउन खोजेको बताए । साथै उनले कम्युनिस्टको संगठन निर्माण र प्रचार गर्ने तरिका कांग्रेसले सिक्नुपर्ने बताए । ‘कांग्रेसले काम गर्छ, प्रचार गर्दैन,’ उनले भने, ‘कम्युनिस्टले सबै काम आफैले गरेको प्रचार गर्छ ।’
कांग्रेसका मुख्य र शीर्षस्त नेताहरुलाई एउटै मञ्चमा देख्दा नेता कार्यकर्तामा एकखाले उत्साह पनि देखिन्थ्यो । कांग्रेस गुल्मीको ऐतिहासिक प्रथम जिल्ला सम्मेलन केन्द्रीय सभापति तथा पूर्व प्रधानमन्त्री शेर बहादुर देउवा, वरिष्ठ नेता रामचन्द्र पौडेल, महामन्त्री शशांक कोइरालासहित अन्य कांग्रेसका प्रभावशाली नेतारु गुल्मी पुगेका थिए ।
जिल्लादेखि केन्द्रसम्मको कांग्रेसलाई मजबुत बन्न सन्देश दिने उद्देश्यले गुल्मी कांग्रेसले उक्त कार्यक्रम आयोजना गरेको जनाएको छ ।
आजको कार्यक्रममा नेकपाका सयौं कार्यकर्ता कांग्रेसमा प्रवेश गरेका थिए । पार्टी परित्याग गरेर कांग्रेसमा प्रवेश गरेकाहरुलाई सभापति देउवा र नेता पौडेलले सम्मानसहित पार्टीमा स्वागत गरेका थिए ।
