बुटवल वैशाख, १०–
सत्तारुढ नेकपाका शीर्ष नेताहरुले जिल्लामा अध्यक्ष र सचिवको पद बाँडफाँड मिलाएको घोषणा गरे पनि पार्टी नेताहरुमा असन्तुष्टि चुलिएको छ । सोमबार पार्टी एकीकरणपछि रुपन्देहीको जिल्ला सचिव पदमा मनोनित दधिराम न्यौपानेले पद अस्वीकार गरेको घोषणा गरेका हुन् ।
पार्टीको केन्द्रीय सदस्यसमेत रहेको न्यौपानेले ‘पार्टी एकता गर्दा यस्तो प्राविधिक त्रुटी भएको केन्द्रीय सदस्य भैसकेकाले सचिवमा अन्य व्यक्तिलाई दिनुपर्छ भन्ने आफ्नो मान्यता रहेको बताए । उनले यसबारे पार्टीको नेतृत्वलाई जनाकारी गराइसकेको पनि प्रष्ट पारे ।
रुपन्देही क्षेत्र नम्बर १ को ‘ख’ बाट प्रत्यक्ष निर्वाचित सांसदसमेत रहेका न्यौपाने प्रदेश नम्बर ५ को अर्थ, उद्योग, पर्यटन समितिका सभापति समेत हुन् ।
सोमबार घोषणा भएको जिल्ला कमिटीमा उनी सचिव पदमा ‘घटुवा’ भएका थिए । सोमबार घोषणा गर्दा पार्टीले रुपन्देहीको अध्यक्ष बुटवल उपमहानगरपालिकाका प्रमुख शिव सुवेदी र सचिवमा न्यौपानेको नाम सार्वजनिक भएको थियो ।
पूर्व माओवादीको सर्वसम्मत नाम सिफारिस भएका व्यक्तिलाई जिल्ला सचिव बनाउनका लागि आफूले आग्रह गरेको पनि न्यौपानेले बताए ।
पाँच नम्बर प्रदेशका १२ जिल्लामध्ये ७ जिल्लामा जिल्लामा दोहोरो भूमिका पाएका नेताहरु रहेका छन् ।