जनकपुर वैशाख, ३१–
कांग्रेस उपसभापति विमलेन्द्र निधिले सरकार वर्तमान ओली सरकार ज्ञानेन्द्र पथमा हिँडेको आरोप लगाएका छन् । पूर्व राजा ज्ञानेन्द्र शाहले जसरी सत्ता हत्याउनका लागि प्रेसमाथि आक्रमण गरेका थिए वर्तमान सरकारको पनि तरिका उस्तै भएको उपसभापति निधिले प्रष्ट पारे ।
मंगलबार गृहजिल्ला धनुषाको जनकपुरमा पत्रकार सम्मेलनको आयोजना गरेर उपसभापति निधिले सरकारले मिडिया काउन्सिल मार्फत प्रेस जगतमाथि अंकुश लगाउन खोजेको भन्दै उक्त विधेयक तत्काल फिर्ता गर्न माग गरे ।
प्रेस काउन्सिललाई खारेज गरेर मिडिया काउन्सिलमार्फत मिडियालाई नियन्त्रण गर्न खोजिनु निन्दनीय भएको नेता निधिको भनाइ छ ।
उनले मिडिया काउन्सिल गठन गरी मन्त्रालयको शाखा कार्यालयको रुपमा परिणत गर्न खोजिएको बताए ।
प्रेस जगतको स्वतन्त्रता माथि आक्रमण गर्नु लोकतन्त्रमाथिको पनि आक्रमण भएको भन्दै उपसभापति निधिले तत्काल मिडिया काउन्सिल सम्बन्धि विधेयक फिर्ता लिन सरकारको ध्यानाकर्षण गराए ।
मिडिया काउन्सिलसम्बन्धी विधेयकमा पत्रकारलाई १ करोड रुपैयाँ सम्म जरिवाना तथा १५ वर्षसम्मको जेल सजायको व्यवस्था राख्नुले सरकार अधिनायकवादको बाटोमा हिँडिरहेको प्रष्ट भएको उपसभापति निधिले दावी गरे ।
निधिले सरकारले संचार जगतसंगै सम्बन्धित विज्ञापन सम्बन्धि ऐन, सूचना प्रविधिसम्बन्धी ऐन, सार्वजनिक प्रसारण सम्बन्धी ऐन समेत ल्याउनु गलत रहेको बताए ।
उनले कांग्रेसले प्रेस स्वतन्त्रताका लागि पत्रकारहरुले गर्ने हरेक आन्दोलनमा सक्रियपूर्वक साथ दिने प्रष्ट बताए ।
