सोलुखुम्बु जेठ, १३–
सोलुखुम्बुको थुलुङ्ग दुधकोशी गाँउपालिकामा शिक्षक सरुवाको विषयलाई लिएर विवाद चर्किएको छ । गाँउपालिकाका अध्यक्षले शिक्षा ऐन २०२८ र नियमावली २०५९ को सामान्य मापदण्ड पनि पूरा नगरेको भन्दै कांग्रेसबाट निर्बाचित गाँउपालिकाका उपाध्यक्षसहित चारजना वडाध्यक्षहरुले विज्ञप्ति निकालेर शिक्षक सरुवा प्रक्रियाको विारोध गरेका हुन् ।
उनीहरुले आफूहरु पनि गाँउपालिकाको जिम्मेवार सदस्य भएको भन्दै सामान्य समाबेशीको सिद्धान्त समेत पालना नगरेकोमा आक्रोश व्यक्त गरेका हुन् । त्यसरी विज्ञप्ति जारी गर्नेहरुमा गाँउपालिका उपाध्यक्ष सविता राई, वडाध्यक्ष, नातिकाजी गुरुङ, वडाध्यक्ष धनराज सुनुवार, वडाध्यक्ष भुपाल ध्वज राई तथा अर्का वडाध्यक्ष फुर्तिमान तामाङ रहेका छन् ।
उनीहरुले जारी गरेको विज्ञप्तिमा लेखिएको छ ‘गाँउपालिकाले अगाडी सारेका सबै विकास निर्माण लगायतका काममा हामी सबैको साथ, सहयोग र सहकार्य भैरहेको अवस्थामा अचानक गाँउ शिक्षा समिति तथा सरोकारवाला पक्षहरुसँग सहकार्य नगरी एकपक्षिय गरिएको विद्यालयको शिक्षक सरुवाले समग्र शैंक्षिक वातावरण खलबलिएको र शिक्षक व्यवस्थापनमा कठिनाइ महसुस भएको छ । शिक्षा जस्तो संवेदनशिल क्षेत्रलाई गुणस्तरिय र व्यवस्थित बनाउनु हामी सबैको कर्तव्य हो तर, शिक्षक सरुवा गर्दा विद्यालयको आबश्यकता, विषयगत दक्षता, विद्यार्थी संख्या र शिक्षकहरुलाई सहुलियत जस्ता विषयप्रति ख्याल नगरिदा शैंक्षिक वातावरण विकास हुनुको सट्टा लथालिंग भएको छ ।’
उनीहरुले विज्ञप्तिमा शिक्षक सरुवालाई तत्काल स्थगित गरी बृहत छलफल र सहमतिबाट समस्या समाधान गर्न सबैसँग अपिल गरेका छन् । उनीहरुले आफैले निर्माण गरेको ऐन तथा नियमावलीको खिालाप हुनेगरी गरिएको शिक्षक सरुवाले स्तब्ध भएको विज्ञप्तिमा उल्लेख गरेका छन् । उनीहरुले एकपक्षिय तरिकाले गरिएको सरुवा तत्काल फिर्ता लिई शान्तिपूर्ण वातावरण निर्माण गर्न समेत माग गरेका छन् ।
