चितवन कांग्रेसको प्रदेशसभा क्षेत्रीय अधिवेशन सुरु

जिल्लाका मुख्य निर्वाचन अधिकृत कमलमोहन पोख्रेलका अनुसार निर्वाचन क्षेत्र नं १(क) का लागि खैरहनी नगरपालिका– ९ मा रहेको पुन समाजको भवनमा मतदान प्रक्रिया सुरु भएको छ । सो निर्वाचन क्षेत्रको क्षेत्रीय सभापतिका लागि दुईजनाको उम्मेदवारी दर्ता भएको उहाँले जानकारी दिनुभयो ।

कृष्णबहादुर श्रेष्ठ र गणेश मल्ल ठकुरीको उम्मेदवारी रहेको छ । यस क्षेत्रमा ३४५ मतदाता छन् । यस्तै १ (ख) को टाँडीमा रहेको होटेल स्टर बैंकुइटमा निर्वाचन प्रक्रिया सुरु भएको छ । यस क्षेत्रमा तीनजना सभापति पदका दाबेदार रहेका छन् । उम्मेदवारहरुमा गोविन्द गौतम, रामहरि न्यौपाने र सुजन थापा रहेका छन् । यहाँ ५६५ जना मतदाता रहेको उहाँले जानकारी दिनुभयो ।

यस्तै निर्वाचन क्षेत्र २ (क) मा ४७७ मतदाता रहेका छन् । जहाँ सभापति पदका लागि तीनजनाको उम्मेदवारी मनोनयन भएको छ । सभापतिका लागि जनार्दन दाहाल, राजकुमार गुरुङ र हरिप्रसाद भण्डारीले उम्मेदवारी दर्ता गराउनुभएको छ । उद्योग वाणिज्य सङ्घ चितवनमा मतदान प्रक्रिया सुरु भएको छ । यस्तै २ (ख)को निर्वाचन अहिले सगोल पार्टी प्यालेस यज्ञपुरीमा सुरु भएको छ ।

सो क्षेत्रका लागि करुणाकान्त पोख्रेल, रचन कार्की र रोशन शाही ठकुरीले उम्मेदवारी दर्ता गराउनुभएको छ । यस निर्वाचन क्षेत्रमा ४९२ जना मतदाता रहेको पोख्रेलले जानकारी दिनुभयो । निर्वाचन क्षेत्र नं ३ (क)को निर्वाचन शहीद स्मारक कलेज शारदा नगरमा सुरु भएको छ ।

यहाँ ६०५ जना मतदाता रहेका छन् । जहाँ तीनजनाले सभापति पदमा मनोनयन दर्ता गराएका छन् । सभापतिका लागि कमलनाथ पौडेल, शालिग्राम पौडल र खेमनारायण सापकोटाले उम्मेदवारी दर्ता गराउनुभएको छ । यता ३ (ख) को निर्वाचन सत्कार पार्टी प्यालेस पार्वतीपुरमा हुँदैछ । यहाँ ३५५ जना क्षेत्रीय प्रतिनिधिहरुले मतदान गर्दैछन् ।

यस क्षेत्रका लागि चारजनाको उम्मेदवारी दर्ता भएको छ । सभापतिमा उम्मेदवार मनोनयन गर्नेमा अशोक लामा, ओमप्रसाद पोख्रेल, राम कँुवर र शोभाखर चापागाईं रहनुभएको छ । हरेक प्रदेशसभा निर्वाचन क्षेत्रले एक सभापति, दुई उपसभापति, दुई सचिव र दुईजना सहसचिव निर्वाचित गर्नेछ । यस्तै १६ देखि १८ जना प्रदेश अधिवेशन प्रतिनिधि निर्वाचित गर्ने पोख्रेलले जानकारी दिनुभयो ।

प्रदेश अधिवेशन प्रतिनिधिहरु नै सो क्षेत्रको कार्यसमिति सदस्य रहने व्यवस्था रहेको छ । प्रदेश प्रतिनिधिसभा निर्वाचन क्षेत्र र सङ्घीय निर्वाचन क्षेत्रको निर्वाचनका लागि बहुमत प्राप्त उम्मेदवार विजयी हुनेछन् । निर्वाचन दिउँसो १ बजे सकिने छ । अहिलेसम्म निर्वाचन प्रक्रिया शान्तिपूर्ण वातावरणमा भइरहेको उहाँले वताउनुभयो । आज साँझसम्म सबै निर्वाचन क्षेत्रको नतिजा आइसक्ने उहाँले जानकारी दिनुभयो । यही मङ्सिर ६ गते प्रतिनिधिसभा निर्वाचन क्षेत्र र १० गते जिल्ला अधिवेशन हुँदै छ ।