एसीसी प्रिमियर कपको समुह चरणको अन्तिम खेलमा नेपाललाई कतारविरुद्ध पाँचौ सफलता हात परेको छ ।
नेपाललाई पाँचौ सफलता सोमपाल कामीले दिलाएका हुन् । उनले जारी खेलमा तीन विकेट लिएका छन् । सोमपालले पाँचौ विकेटको रुपमा कतारका इक्रामुल्लाह खानलाई पाँच रनमा आउट गरेका हुन् । कतार १२ ओभरको समाप्तीमा ३७ रनमा पाँच विकेट गुमाएको छ । खेलको १० औं ओभरको चौथो बलमा उनले कतारका मुहम्मद तनभिरलाई शुन्य रनमा आउट गरेका हुन् ।
यसअघि सोमपालले नेपाललाई दोस्रो विकेट दिलाएका थिए । कतारले ३० रन बनाएको स्थितिमा इमाल लियाङगीलाई खेलको छैटौं ओभरको सोमपालले विकेट लिएका थिए । उनले ६ रन बनाएका थिए ।
नेपाललाई तेस्रो सफलता सन्दिप लामिछानेले दिलाएका थिए । खेलको नवौं ओभरको तेस्रो बलमा सन्दिपले जाहिरलाई आरिफ शेखको हातबाट क्याच आउट गरेका हुन् ।
पहिलो विकेटका रुपमा ओपनर कमरान खान आउट भएका थिए । उनले ८ रन बनाएका थिए । खेलको तेस्रो ओभरको दोस्रो बलमा ललितले कमरानलाई दिपेन्द्र सिंह ऐरिको हात बाट क्याच आउट गरेका हुन् ।
यसअघि त्रिवि क्रिकेट मैदानमा टस हारेर पहिला ब्याटिङको निम्तो पाएको नेपाललाई खेलको ४०।३ ओभरमा १५७ रन बनाउँदा सबै विकेट गुमाएको हो ।
नेपालका लागि सर्वाधिक रन सन्दिप लामिछानेले बनाएका छन् । उनी अविजित रहँदै ४२ रन बनाएका छन् ।
नेपालले खराब सुरुवात गरेको थियो । नेपालले पहिलो ९ रन बनाउँदा दुई विकेट गुमाएको थियो । नेपालका ओपनर कुशल भुर्तेल दुई तथा भिम सार्की ६ रन बनाउँदै आउट भएका थिए ।
त्यस्तै रोहित पौडेलले २७ रन बनाउँदा आशिफ शेख १९, दिपेन्द्र सिंह ऐरीले १२ रनको योगदान गरे । सोमपाल कामी र आरिफ शेखले समान ११ रनको योगदान गरे । नेपालका पाँच खेलाडीले दोहोरो अंकको रन बनाउन असफल रहे । कुशल मल्ल तीन, गुल्शन झा सात रन र ललित राजवंशी एक रन बनाउँदै आउट भएका थिए ।
कतारका लागि आमिर फारुकले सर्वाधिक चार विकेट लिँदा ववाइस अहमदले तीन र गयान मुनाविराले दुई र इक्रामुल्लाह खानले एक विकेट लिए ।