मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

रामग्राम क्षेत्र निजी कम्पनीलाई दिने निर्णयको कागजात उपलब्ध गराउन सरकारलाई लेखा समितिको निर्देशन



काठमाडौं,१६ माघ । ऐतिहासिक र धार्मिक महत्वको रामग्राम परियोजना निजी कम्पनीलाई निर्माण गर्न दिने निर्णयको कागजात तत्काल उपलब्ध गराउन सरकारलाई प्रतिनिधि सभा अन्तर्गतको सार्वजनिक लेखा समितिले निर्देशन दिएको छ ।

मंगलबार बसेको समितिको बैठकले पश्चिम नवलपरासीमा रहेको रामग्राम क्षेत्रको उत्खनन गर्ने काम बिनाप्रतिस्पर्धा निजी कम्पनीलाई दिने संस्कृति पर्यटन तथा नागरिक उड्डयन मन्त्रालयले निर्णय गरेको थियो । मन्त्रालयको उक्त निर्णयबारेमा समितिमा कुरा उठेपछिसो बारेमा सार्वजनिक लेखा समितिले चासो राखेको हो ।

‘लुम्बिनी विकास कोषले सर्वसाधारणको ११६ बिघा जमिन अधिग्रहण गर्ने गरी गौतमबुद्धको अस्थिधातु समाधिस्थ गरिएको नवलपरासी रामग्राम क्षेत्रमा उत्खनन् एवं बौद्ध स्तुप निर्माण तथा भाडामा ९९९ वर्ष सम्म० दिने गरी बिनाप्रतिस्पर्धा निजी कम्पनीसँग समझदारी गरेको भन्ने समाचारप्रति यस समितिको गम्भीर ध्यानाकर्षण भएको छ,’ समितिका सचिव एकराम गिरीले लेखेको पत्रमा उल्लेख छ, ‘तपसिलका विषयमा के कसो भएको हो सोको जानकारी समितिलाई ७ दिनभित्र उपलब्ध गराउनुहुन माननीय सभापतिज्यूको निर्देशानुसार अनुरोध गर्दछु।’

पश्चिम नवलपरासीको रामग्राम क्षेत्र विकासको जिम्मा प्रधानमन्त्री पुष्पकमल दाहालका घरबेटीलाई दिन लुम्बिनी विकास कोष सहमत भएको थियो ।

‘प्रतिस्पर्धा नगराई कुनै एक निजी कम्पनीसँग समझदारी भएको हो वा होइनरु’, पत्रमा उल्लेख छ,‘प्रमिस्ड ल्याण्ड तथा मोक्ष फाउन्डेसनको भनिएको प्रस्ताव अघि बढाउन भएका पत्राचारहरू, लुम्बिनी विकास कोषसँग भएको समझदारी, समझदारी गर्नुपूर्व कोषबाट भएका निर्णयहरू, सम्बन्धित पक्षले लुम्बिनी विकास कोषलाई बुझाएको प्रस्तावहरू, मोक्ष फाउन्डेसनले आफ्नो बेवसाइटमा लुम्बिनी र रामग्रामसँग सम्बन्धित सूचनाहरू राख्नको लागि कोषसँग स्वीकृति लिएको पत्र लगायतका कागजातको प्रति समितिलाई उपलब्ध गराउनू।’

रामग्राम गौतम बुद्धको अस्थिधातु राखिएका आठ स्थलमध्ये एक मानिन्छ। कोषले केही समयअघि परियोजना तयार गरी रामग्राम क्षेत्रलाई पर्यटकीय स्थलका रूपमा विकास गर्न प्रचण्डका घरधनी शारदाप्रसाद अधिकारीका छोरा निकेश अधिकारीको निर्माण कम्पनी प्रमिस्ड ल्यान्ड लाई दिन सैद्धान्तिक सहमति प्रदान गरेको छ भने प्रधानमन्त्री पुष्पकमल दाहाल प्रमुख अतिथिका रूपमा उपस्थित भएर मंसिर २६ मा रामग्राममा स्तूपा निर्माण र उत्खनन परियोजनाको शिलान्यास गरिसकेका छन् ।

प्रकाशित मिति : १६ माघ २०८०, मंगलबार  ४ : ०२ बजे