एजेन्सी– भारतमा जारी इन्डियन प्रिमियर लिग (आईपीएल) क्रिकेटअन्तर्गत बुधबारको खेलमा सनराइजर्स हैदराबादले आईपीएल इतिहासकै सबैभन्दा ठूलो २७७ रनको योगफल बनाएको छ ।
रोयल च्यालेञ्जर्स बैंग्लोरले सन् २०१३ मा बनाएको २६३ रनको सर्वाधिक ठूलो गोगफल भंग गर्दै नयाँ इतिहास बनाएको छ ।
राजीव गान्धी क्रिकेट मैदानमा टस हारेर पहिला ब्याटिङको निम्तो पाएको हैदराबादले तीन विकेटको क्षतिमा २७७ बनायो ।
२७८ रनको विशाल लक्ष्य पछ्याएको मुम्बईले निर्धारित २० ओभरमा ५ विकेट गुमाएर २४६ रन मात्र बनाउन सक्यो ।
मुम्बईका लागि तिलक बर्माले अर्धशतक ६४ रन बनाए । इशन किसनले ३४ रन, रोहित शर्माले २६ रनको योगदान दिए । टिम डेविड ४२ रन र रोमारियो शेफर्ड १५ रनमा अविजित रहे ।
हैदराबादका जयदेव उनादकट र प्याट कमिन्सले २–२ विकेट लिए भने शाहबाज अहमदले १ विकेट हात पारे ।
यसअघि पहिले ब्याटिङ गरेको हैदरवादका लागि हाइनरिक क्लासनले अविजित सर्वाधिक ८० रन बनाए । त्यस्तै, एडन मारक्रमले ४२ रन, अभिषेक शर्माले ६२ रन बनको योगदान दिए ।
मुम्बईका हार्दिक पाण्ड्या, जेराल्ड कट्जी र पियुष चावलाले १–१ विकेट लिएका थिए ।
छक्का र चौकाको वर्षा भएको खेलमा ३८ छक्कासहित कुल ५२३ रन बने ।
जारी आईपीएलमा हैदरबादको पहिलो जित हो भने मुम्बईको लगातार दोस्रो हार हो ।
चेन्नाई सुपर किंग्स लगातार दुई खेल जित्दै चार अंकका साथ तालिकाको शीर्ष स्थानमा रहेको छ । राजस्थान, हैदराबाद, कोलकाता, पञ्जाव, बेंग्लुरु र गुजरातले समान दुई–दुई अंक जोडेका छन् । अहिलेसम्म दिल्ली, मुम्बई र लखनऊले जित निकाल्न सकेका छैनन् ।