काठमाडौं– भारतमा जारी इन्डियन प्रिमियर लिग (आईपीएल) क्रिकेटमा मुम्बई इन्डियन्सले दोस्रो जित दर्ता गर्दा रोयल च्यालेन्जर्स बेंग्लोरले ब्यहोरेको छ । बिहीबार राति वांङखडे स्टेडियममा बेंग्लोरले निर्धारित ओभरमा ८ विकेट गुमाएर १९६ रन बनाएको थियो । जवाफमा मुम्बईले १५.३ ओभरमा ३ विकेट गुमाएर १९९ रन बनाउँदै ७ विकेटको जित दर्ता गर्न सफल भयो ।
मुम्बईलाई जिताउन इशान किसन र सूर्यकुमार यादवले अर्धशतकीय पारी खेल्दा रोहित शर्मा, हार्दिक पाण्ड्या र तिलक वर्माको पारी पनि उत्कृष्ट रह्यो ।
लक्ष्य पछ्याउने क्रममा इशान किशन र रोहित शर्माले पहिलो विकेटका लागि १०१ रनको साझेदारी गर्दै बलियो सुरुआत गराए । ८.५ ओभरमा पहिलो विकेटको रुपमा इशान किसन ६९ रन बनाएर आउट भएका थिए । उनले ३४ बलमा ५ छक्का र ७ चौका प्रहार गरे ।
त्यसपछि रोहित र सूर्यकुमार मिलेर मुम्बईको रथ अघि बढाए । रोहित २४ बलमा ३४ रन बनाएर आउट हुँदा मुम्बईले ११.२ ओभरमा १३९ रन बनाएको थियो । रोहितले तीन छक्का र तीन चौका प्रहार गरे । त्यसपछि सूर्यकुमार र कप्तान हार्दिक पाण्ड्या मिलेर टिमलाई जित नजिक लगेका थिए । र्सूकुमार १९ बलमा ५२ रनको अर्धशतकीय पारि खेल्दै आउट भए ।
सूर्यकुमारले १७ बलमै अर्धशतक पूरा गरेका थिए । उनले चार छक्का र पाँच चौका प्रहार गरे । कप्तान हार्दिक पाण्ड्या र तिलक बर्माले अन्त्यमा नटआउट पारी खेल्दै मुम्बईलाई सहज जित दिलाए ।
पाण्ड्याले ६ बलमा २१ रन बनाउँदा तीन छकका प्रहार गरे भने वर्माले १० बलमा १६ रन बनाउँदा तीन चौका प्रहार गरे । बेंग्लोरका आकाश दीप, विजयकुमार र विल ज्याकले एक एक विकेट लिए ।
टस हारेर पहिला ब्याटिङ गरेको बेंग्लोरको सुरुआत राम्रो भएन । स्टार क्रिकेटर विराट कोहली ३ रन बनाएर आउट हुँदा पहिलो विकेट १४ रनमा गुमेको थियो । त्यसपछि विल ज्याक ८ रन बनाएर आउट भएका थिए । कप्तान फाफ डु प्लेसिस र रजत पटिदार मिलेर बेंग्लुरुको पारि सम्हालेका थिए ।
पटिदारले २६ बलमा ५० रनको अर्धशतकीय पारि खेल्दै आउट हुँदा ११.३ ओभरमा १०५ रन बनेको थियो । पटिदारले आफ्नो पापिरमा चार चौका र तीन छक्का हिर्काए । ग्लेन म्याक्सवेल फेरि फ्लप भए ।
उनले खाता नै खोल्न सकेनन् । कप्तान प्लेसिस र दिनेश कार्तिकको जोडीले खेल अघि बढाउँदै टिमको स्कोर १५० प्लस बनाएको थियो । १५३ रन हुँदा कप्तान प्लेसिस ६१ रनको अर्धशतकीय पारि खेलेर आउट भएका थिए । उनले ४० बलमा तीन छक्का र चार चौका प्रहार गरे । त्यसपछि मेहिपल लोमरोरले खाता खोल्न सकेनन् भने सौरभ चौहार ९ रन बनाएर आउट भए ।
विजय कुमारले पनि खाता खोल्न असफल हुँदा अन्त्यमा दिनेश कार्तिक र आकाश दीप नटआउट रहे । कार्तिकले २३ बलमा ५३ रनको आक्रामक पारि खेल्दा चार छक्का र पाँच चौका प्रहार गरे । आकाश दीप भने २ रनमा नटआउट रहे । मुम्बईका जसप्रित बुमराहले सर्वाधिक ५ विकेट लिँदा गेराल्ड कोट्जी, आकाश भधवाल र श्रीयस गोपालले एक एक विकेट लिए ।
दोस्रो जित पछि मुम्बई ४ अंकका साथ तालिकाको सातौं स्थानमा छ भने लगातार हार व्यहोरेको बेंग्लोर २ अंकका साथ नवौं स्थानमा छ ।
