काठमाडौं । नेपालका दुई प्रतिष्ठित साहित्यकार तथा मदन पुरस्कार विजेता अमर न्यौपाने र विवेक ओझाले हाल प्रदर्शनरत नेपाली चलचित्र ‘महाभोज’ हेरेर आफ्नो प्रतिक्रिया व्यक्त गरेका छन् ।
उनीहरू दुवैले चलचित्रको विषयवस्तु, कथावस्तुको प्रस्तुति र कलाकारहरूको अभिनयको खुलेर प्रशंसा गरेका छन् ।
न्यौपानेले ‘महाभोज’ लाई ‘यो समयको कथा बोकेको चलचित्र’ को संज्ञा दिएका छन् । उनले हाल समाजमा व्याप्त सहकारी ठगीको मुद्दालाई चलचित्रले सशक्त रूपमा प्रस्तुत गरेको उल्लेख गरेका छन् । न्यौपानेका अनुसार, ‘यति बेला धेरै सहकारी बेकारी बनेका छन् । त्यहाँ धेरैको पसिनाको मूल्य हराएको छ । पीडितहरू किसान, मजदुर र श्रमजीवी वर्ग छन् भने पीडकहरू हुनेखानेहरू छन् ।’
उनले चलचित्रमा ग्रामीण भेगका विभिन्न मानिसका कथा-व्यथालाई सहकारी घोटालासँग जोडेर प्रस्तुत गरिएको र कथा सलल बगेको बताएका छन् । न्यौपानेले चलचित्रको अभिनय र निर्देशकीय पक्ष निकै सबल रहेको टिप्पणी गर्दै चलचित्र हेरेपछि देशमा कानुनको कमजोरी र बल प्रयोग गरेरै न्याय खोज्नुपर्ने परिस्थितिको चित्रणप्रति दुःख व्यक्त गरेका छन् । उनको भनाइमा, ‘यो चलचित्रको कमजोरी होइन, नियम-कानुनको कमजोरी हो । न्याय कानुनले दिन सक्नुपर्थ्यो तर चलचित्रले दिनुपर्यो ।’ उनले चलचित्र धेरैलाई आफ्नै कथा लाग्ने खालको रहेको पनि जनाएका छन् ।
अर्का मदन पुरस्कार विजेता साहित्यकार विवेक ओझाले ‘महाभोज’मा प्रत्येक कलाकारको अभिनय निकै बलियो लागेको बताएका छन् । विशेष गरी कलाकारहरूले आफ्ना पुराना चरित्रहरूभन्दा निकै उच्च स्तरको अभिनय गरेको महसुस गरेको उनले उल्लेख गरेका छन् ।
ओझाका अनुसार, दुई घण्टा अवधिको यो चलचित्रले समाज, परिवार र व्यक्तिगत मनोभावना तथा मनोविज्ञानलाई निकै मसिनो गरी केलाउन सफल भएको छ । चलचित्रको कथा समसामयिक सहकारी घोटाला वरपर घुमे पनि यसले घरपरिवारको नाता सम्बन्ध, गाउँ समाजको विश्वास र धोकाका सम्बन्धलाई सँगसँगै हिँडाएको छ, जुन निकै सुहाउँदो रहेको उनको भनाइ छ ।
उनले समाजको र कानुनको चरित्रबिचको द्वन्द्व, कानुनी छिद्र र विश्वासको दुरुपयोग, अनि कसरी मान्छे कानुनी र सामाजिक रूपमा सबथोक गुमाएर लाचार र विकल्पविहीन हुन पुग्छ भन्ने जस्ता विषयहरूलाई मिहिन तवरले प्रस्तुत गरिएकोमा प्रशंसा गरेका छन् । ओझाले कथाले दर्शकलाई तानिरहने भन्दै सपरिवार नजिकैको सिनेमा घरमा गएर हेर्न आग्रह गरेका छन् । ‘महाभोज’ले निराश नपार्ने उनको विश्वास छ ।
नेपाली साहित्यका एक स्थापित नाम अमर न्यौपानेले आफ्नो उपन्यास ‘सेतो धरती’का लागि २०६८ सालको मदन पुरस्कार प्राप्त गरेका थिए । उनका कृतिहरूमा गहिरो सामाजिक चेतना र मानवीय संवेदनशीलता पाइन्छ । यस्तै, युवा पुस्ताका चर्चित साहित्यकार विवेक ओझाले आफ्नो उपन्यास ‘ऐँठन’का लागि २०७९ सालको मदन पुरस्कार जितेका थिए । उनका लेखनमा समसामयिक विषयवस्तु र मनोवैज्ञानिक पक्षको विश्लेषण मुख्य विशेषताका रूपमा रहन्छ ।
यी दुई मदन पुरस्कार विजेता साहित्यकारहरूको प्रतिक्रियाले चलचित्र ‘महाभोज’ ले नेपाली समाजको महत्त्वपूर्ण र समसामयिक मुद्दालाई पर्दामा ल्याउन सफल भएको पुष्टि गर्छ । सहकारी घोटाला, यसबाट सिर्जित मानवीय पीडा र न्यायको खोजी जस्ता विषयहरूलाई सशक्त अभिनय र कुशल निर्देशनमार्फत प्रस्तुत गरिएको यस चलचित्रलाई साहित्यकारहरूको सकारात्मक प्रतिक्रियाले थप चर्चामा ल्याएको छ । दर्शकहरूका लागि ‘महाभोज’ हेर्नु एक मनोरञ्जनका साथै सामाजिक यथार्थको दर्पण बन्न सक्ने देखिन्छ ।
दिनेश राउतको निर्देशन, विकास सुवेदीको लेखन र हिमाल कडरियाको निर्माण रहेको ‘महाभोज’मा आर्यन सिग्देल, दयाहाङ राई, खगेन्द्र लामिछाने, अञ्जना बराइली, मलिका महत, गौमाया गुरुङ, वसुन्धरा भुसाल, मोहन निरौला, विनोद न्यौपाने लगायतको प्रमुख अभिनय रहेको छ ।
