काठमाडौं । प्रतिनिधि सभाको बैठकमा प्रधानमन्त्रीसँगको प्रत्यक्ष प्रश्नोत्तर कार्यक्रम सञ्चालन गर्न माग गर्दै प्रमुख प्रतिपक्षी दल नेपाली कांग्रेससहितका विपक्षी दलहरूले संसद अवरुद्ध गरेका छन् ।
प्रधानमन्त्रीलाई संसदमा उपस्थित गराई प्रश्नोत्तरमा सहभागी गराउनुपर्ने माग राख्दै विपक्षी दलका सांसदहरूले रोस्टम घेराउ ‘वेल घेराउ’ गरेपछि सदनको कारबाही प्रभावित भएको हो ।
बैठक शुरु हुनासाथ प्रमुख प्रतिपक्षी नेपाली काँग्रेस, नेकपा (एमाले), नेपाली कम्युनिष्ट पार्टी, श्रम संस्कृति पार्टी र राष्ट्रिय प्रजातन्त्र पार्टी (राप्रपा) का सांसदहरूले वेल घेराउ गर्दै नाराबाजी सुरु गरेका थिए ।
बैठकमा सभामुखले विपक्षीको विरोधका बीच बैठक अगाडि बढाएका छन् ।
प्रधानमन्त्रीले संसदमा जवाफ दिनुपर्ने र संसदीय नियमअनुसार प्रश्नोत्तर कार्यक्रम हुनुपर्ने अडान विपक्षी दलहरूको छ । यसअघि आजै दिउँसो बसेको बैठकमा पनि विपक्षी दलहरूले सोही माग राखेर अवरोध गरेपछि बैठक केही समयका लागि स्थगित गरिएको थियो । स्थगित बैठक पुनः शुरु भएपनि विपक्षी दलहरूको विरोध र नाराबाजी यथावत छ ।
