काठमाडौं ।
निर्मला पन्तको बलात्कार र हत्यामा संलग्न दोषीलाई पत्ता लगाउने कार्यमा राज्य अझै गम्भीर नभएको भन्दै कञ्चनपुरमा फेरी आन्दोलन सुरु भएको छ । निर्मला पन्तको न्यायका लागि भन्दै नागरिक संघर्ष समिति, कञ्चनपुरको अगुवाइमा भीमदत्तका महिलाहरु धर्नामा बसेका हुन् ।
धर्नामा बस्नेहरुले निर्मला पन्त हत्याबारे उच्चस्तरीय छानविन समितिको प्रतिवेदन यथाशीघ्र सार्वजनिक गर्न माग गरेका छन् ।
गृहमन्त्रालयका सहसचिव हरिप्रसाद मैनालीको नेतृत्वमा गठन भएको उच्चस्तरीय छानविन समितिले केही दिन पहिले मात्रै गृहमन्त्री रामबहादुर थापालाई छानविनको पूर्ण प्रतिवेदन बुझाएको थियो ।
प्रतिवेदन बुझाएकै दिन गृहमन्त्री रामबहादुर थापाले संसदमा निर्मलाको हत्यामा व्यक्ति भन्दा पनि समूह नै रहेको संकेत गरेका थिए ।
पछिल्लो समय उनले यसमा राजनीति घुसाएका छन् । उनले पुँजीवादका कारण बलात्कारका घटना घटिरहेको भन्दै घटनाको संवेनशीलता कमजोर पार्न खोजेका छन् । गृहमन्त्रीको यो भनाइको सर्वत्र विरोध भएको छ ।
यसैबीच, बलात्कारपछि हत्या गरिएकी कञ्चनपुरकी १३ वर्षीया किशोरी निर्मला पन्तका लागि न्याय माग्दै राजधानीमा शनिबार पनि प्रदर्शन भएको छ ।
शनिबार माइतीघर मण्डलामा स्वतस्फूर्त रुपमा प्रदर्शन भएको हो । उनीहरुले निर्मलाहरुलाई न्याय देउ, सरकार कहाँ चुक्दैछ, बलात्कारीसँग झुक्दैछ, बलात्कारी किन लुकाउँदै लगायतका नारा लेखेका प्ले कार्ड बोकेका थिए ।