मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

पार्टीको केन्द्रीय सचिवालय बैठक समेत बस्न नसकेकोमा प्रचन्डले पोखे कार्यकर्ता सग गुनासो



काठमाडौं मंसिर, १२–

गुनासोसहित अध्यक्ष प्रचण्डलाई भेट्न पुगेका पार्टी केन्द्रीय सदस्यहरुसँग प्रचण्ड स्वयमले गुनासो पोखेका छन् ।  सत्तारुढ दल  नेपाल कम्युनिस्ट पार्टी (नेकपा) मा नियमित बैठक नबस्ने र पार्टीभित्र छलफल नहुने गुनासो लिएर भेट्न गएका केन्द्रीय सदस्यहरुलाई प्रचण्डले उल्टो गुनासो गरेर फर्काईदिएका छन्  । उनले पार्टीको केन्द्रीय सचिवालय बैठक समेत बस्न नसकिरहेको भन्दै  दिक्दारी व्यक्त गरेका हुन् ।

पार्टी केन्द्रीय कमिटी बैठक माग गर्दै ८ बुँदे ज्ञापनपत्र बुझाएका २२ केन्द्रीय सदस्यहरुसँग मंगलवार भएको भेटमा प्रचण्डले बैठक बस्न नसकिरहेको भन्दै लाचारी व्यक्त गरेको एक नेताले बताए । उनका अनुसार अध्यक्ष प्रचण्ड आफैं असन्तुष्ट देखिए ।

प्रचण्डको भनाइ उधृत गर्दै ती नेताले भने,  ‘तपाईंहरुका माग र गुनासा जायज नै छन् । अबको बैठकका एजेण्डा पनि यिनै हुन् । तर, बैठक नै बस्न सकिरहेको छैन । प्रधानमन्त्रीको व्यस्तताले पनि होला । बैठक नै बस्न नसकिने, खै के खै के जस्तो भइरहेको छ ।

सोमवारै केन्द्रीय सचिवालय बैठक बसेर केन्द्रीय सदस्यहरुको कार्यविभाजन तथा प्रदेश कमिटीहरुको टुंगो लगाउने भनिए पनि बैठक बस्न सकेको छैन । प्रधानमन्त्री तथा पार्टी अध्यक्ष केपी शर्मा ओलीले बैठक सार्ने गरेको आरोप नेकपा नेताहरुले लगाएका छन् ।

यसैबीच नेकपा सचिवालयको बैठक बुधवार अपरान्ह ४ बजे बोलाइएको छ । यद्यपि अन्तिम समयमा प्रधानमन्त्रीको समय नमिलेमा बैठक स्थगित हुन सक्ने स्रोतले जनाएको छ । यसअघि केन्द्रीय सदस्यहरुको कार्य विभाजन टुंगो लगाउनका लागि बैठक रोकिएको थियो ।

केन्द्रीय सचिवालयले कार्यविभाजन तथा एकीकरणको प्रस्ताव तयार पारेपछि स्थायी कमिटी बैठक बोलाइने नेकपाले जनाएको छ । बिधानअनुसार ३ महिनामा बस्नुपर्ने स्थायी कमिटी बैठक ५ महिनादेखि बस्न सकेको छैन ।

 

प्रकाशित मिति : १२ मंसिर २०७५, बुधबार  ७ : ४३ बजे