काठमाडौं पुस, १३–
सत्तारुढ नेपाल कम्युनिस्ट पार्टी (नेकपा)को स्थायी कमिटी बैठक निकै चर्चा–परिचर्चाको बिषय बन्न पुग्यो । अध्यक्षद्वयको प्रतिवेदनसँगै अर्का नेता वामदेव गौतम र भिम रावलले पनि छुट्टै प्रतिवेदन पेश गरेपछि नेकपाको बैठक थप चर्चामा पुगेको थियो । लामो समयसम्म चलेको स्थायी समिति बैठकले अध्यक्षद्धयको राजनीतिक प्रतिवेदन परिर्माजनसहित पास गरेको छ । नेकपाका नेता झलनाथ खनालका अनुसार शुक्रबार बसेको बैठकले प्रतिवेदन पास गरेको हो । नेताहरुका अनुसार परिर्माजित प्रतिवेदन सचिवालयमा पेश हुनेछ ।
साथै संगठनात्मक एकताबारे गृहकार्य गर्न कार्यदल बनेको छ । कार्यदलमा महासचिव विष्णु पौडेल, रामबहादुर थापा बादल, शंकर पोखरेल, वर्षमान पुन, योगेश भट्टराई, सुरेन्द्र पाण्डे, बेदराम भुसाल र लेखराज भट्ट रहेका छन् । कार्यदलको प्रस्तावका आधारमा यो महिनाभित्रै अर्को स्थायी कमिटी बसेर संगठनात्मक काम सकाउने नेकपाले जनाएको छ ।
