काठमाडौं पुस, २८–
ठगी अभियोगमा गीतकार योगेन्द्रमणि दाहाल पक्राउ परेका छन् । जिल्ला अदालत ललितपुरबाट सजाय पाएर फरार सूचीमा रहेका ५२ वर्षीय दाहाललाई पुस २७ गते बालुवाटारबाट पक्राउ परेको प्रहरीले जनाएको छ ।
ललितपुर महानगरपालिका वडा नं. ३ मा रहेको नेपाल विटुमिन तथा व्यारेल उद्योग लिमिटेडका सञ्चालक अशोककुमार श्रेष्ठले दाहालविरुद्ध जिल्ला अदालत ललितपुरमा मुदद्दा दिएका थिए ।
जिल्ला अदालत ललितपुरले दाहालले नेपाल विटुमिन तथाव्यारेलउद्योग लिमिटेडमा १२ करोड ३५ लाख ९६ हजार ५ सय ४ रुपियाँ ५४ पैसा ठगी गरेको पुष्टि भएपछि जरिवाना र कैद सजाय तोकेको थियो ।
जिल्ला अदालत ललितपुरले ०७४ मंसिर १४ गते फैसला गर्दै दाहाललाई विगो बराबरको जरिवाना र दुई वर्ष कैद सजाय तोकेको थियो । त्यसपछि गीतकार दाहाल फरार थिए ।
भक्तपुर जिल्लाको ठिमी नगरपालिका वडा नं. १७ कौशलटारमा स्थायी घर भै हाल काठमाडौं महानगरपालिकाको वडा नं. ४ बालुवाटारमा दाहाल बस्दै आएका थिए । दाहालका थुप्रै चर्चित गीतहरु छन् । उनी नाम चलेका गीतकारको सूचीमा पर्छन ।
