काठमाडौं पुस, २९–
नेपाली कांग्रेसका नेता तथा सांसद मिनेन्द्र रिजालले सरकारको चर्को आलोचना गरेका छन् । आइतबार संसदको बैठकमा बोल्दै नेता रिजालले सरकारले राष्ट्रपति कार्यालयलाई नयाँ दरबारको रूपमा सेवा सुविधा दिन लागेको भन्दै आपत्ति जनाए । सरकारले राष्ट्रपतिलाई १८ करोडको गाडीमा र डेढ अर्बको हेलिकप्टरमा चढाएर भोगविलासको जीवनमा पूरानो दरबारलाई पनि जितेको उनको भनाइ थियो । त्यस्तै, नेता रिजालले गत आइतबार प्रधानमन्त्री केपी शर्मा ओलीले संसदमा प्रस्तुत गरेका अर्थतन्त्रको वर्तमान स्थिती झूट रहेको प्रष्ट पारे ।
यसमा अर्थमन्त्रालयका अधिकारीहरु समेत प्रत्यक्ष रुपमा प्रधानमन्त्रीको विरुद्ध बोल्न नसकेपनि अप्रत्यक्ष रुपमा प्रधानमन्त्रीको गलत तथ्यांकबारे बोल्ने गरेको उनको भनाइ थियो ।
अर्थमन्त्रालयले दैनिक रुपमा प्रकाशित गर्ने सरकारी खर्चको विवरण र राष्ट्र बैंकले हरेक महिनामा निकाल्ने मूल्य बृद्धिको विवरणसँग प्रधानमन्त्रीले प्रकाशित गरेको विवरणको आकाश जमिनको फरक रहको थियो । यसरी प्रधानमन्त्रीले गलत तथ्यांक दिएपछि प्रतिपक्षीले सो दिन त प्रश्न सोध्ने नाममा संसदमा हंगामा नै मच्चायो ।
तर, पछि सहमति भएपछि प्रश्न नसोधि काँग्रेस पछि हट्यो । आईतबार बसेको संसद बैठकमा नेपाली काँग्रेसका सांसद मिनेन्द्र रिजालले प्रधानमन्त्रीले संसदमा झुट बोलको विषयमा आपत्ति जनाएका थिए ।
उनले अहिले ४.२ प्रतिशतको मूल्यबृद्धि रहेकोमा प्रधानमन्त्रीको तथ्यांकमा ७.३ प्रतिशत कसरी आयो रु भनेर प्रश्न गरेका थिए । उनले १५ प्रतिशत रहेको सरकारी खर्च प्रधानमन्त्रीको तथ्यांकमा भने कसरी २५ प्रतिशत पुग्यो भनेर प्रश्न गर्दा संसदमै मन्त्रीहरु बस्ने कुर्सीमा सँगै बसिरहेका अर्थमन्त्री युवराज खतिवडा र पर्यटनमन्त्री रविन्द्र अधिकारी भने मुसुमुसु हाँसिरहेका थिए ।
रिजालले सरकारी खर्च कम, मूल्य बृद्धि बढी शोधनान्तर स्थिती ५७ अर्बले ऋणात्मक यस्ता नकारात्मक स्थिती धेरै भईरहँदा प्रधानमन्त्रीलाई सरोकारवालाहरुले किन नपढाई पठाएर उल्टो विवरण पठाएको भन्दै प्रश्न गरेका छन् । उनले प्रधानमन्त्रीलाई संसदमा बोल्न पठाउँदा त राम्रोसँग पढाएर पठाउन सुझाव समेत दिएका छन् ।