काठमाडौं माघ, १५–
सरकारविरुद्ध प्रदर्शनमा उत्रिएको नेपाल विद्यार्थी संघका १ दर्जन कार्यकर्ता पक्राउ परेका छन् । मंगलबार प्रधानमन्त्री निवास बालुवाटारमा सिट्ठी जुलुस गरिरहेको अवस्थामा नेविसंघका पूर्वकेन्द्रीय सदस्य गणेश सापकोटासहित करिब ३० जना पक्राउ परेको नेविसंघले जनाएको छ । कांग्रेस भातृसंगठन समेत रहेको नेविसंघ डाक्टर गोविन्द केसीको जीवनरक्षाको माग गर्दै पछिल्ला दिनमा निरन्तर सरकार विरोधी आन्दोलनमा संलग्न छ ।
संसदले पारित गरेको चिकित्सा विधेयक पूर्वसम्झौता अनुरुप नभएको र सरकारले अधिनायकवादी शैली अपनाएको भन्दै देशैभर आन्दोलित भएका नेविसंघका कार्यकर्ता काठमाडौं लगायत धेरै जिल्लामा आन्दोलित रहेका छन् ।