मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

विराटनगरमा मनाईयो नोना कोइरालाको १२ औं स्मृति दिवस



विराटनगर माघ, १९–
नेपाली कांग्रेसकी नेतृ नोना कोइरालाको १२ औं  स्मृति दिवस मनाईएको छ । शनिबार नोना कोइराला स्मृति प्रतिष्ठानको आयोजनामा उक्त स्मृति दिवस कार्यक्रम सम्पन्न गरिएको हो । प्रदेश नम्बर १ का प्रदेश प्रमुख डा. गोविन्द तुङ्वाहाङको प्रमुख आतिथ्यमा सम्पन्न कार्यक्रममा बोल्दै नेपाली कांग्रेसका केन्द्रीय सदस्य डा. शेखर कोइरालाले वर्तमान अवस्थामा राजनीतिमा संस्कार तथा नैतिकता हराएको बताए । उनले त्यसरी राजनीतिमा हराएको नैतिकता र संस्कारका कारण नेपाली जनताले त्यसको असर भोग्नुपरेको बताए ।

डा. केसीको माग पूरा नगरी सरकारले जबरजस्ती चिकित्सा शिक्षा विधेयक पारित गरेको नेता कोइरालाको भनाइ छ । उनले सरकारले डा. केसीमाथि मात्रै नभएर नैतिकता र सामाजिक न्यायमाथि समेत धावा बोलेको आरोप लगाए । त्यस्तै, कार्यक्रममा बोल्दै विराटनगर महानगरपालिकाका मेयर भिम पराजुलीले विराटनगरको शैक्षिक विकास, सामाजिक विकासमा स्वर्गीय नोना कोइरालाको महत्वपूर्ण योगदानलाई विराटनगरवासीले कहिल्यै नविर्सने बताए ।

उक्त कार्यक्रममा प्रदेशसभा सदस्य केदार कार्की, नेपाली कांग्रेसका केन्द्रीय सदस्य अमृत अर्याल, आमन्त्रित केन्द्रीय सदस्य हसन अन्सारी लगायतले नेतृ कोइरालाकाबरेमा चर्चा गरेका थिए । यो पटक नोना कोइराला पत्रकारिता पुरस्कार अन्नपूर्ण पोष्टका सम्पादक हरीबहादुर थापालाई प्रदान गरिएको थियो ।प्रतिष्ठानले विराटनगर भर नै विभिन्न सामाजिक उत्तरदायित्वका काम गर्दै आईरहेको छ ।

प्रकाशित मिति : १९ माघ २०७५, शनिबार  २ : ४० बजे