काठमाडौं माघ, २५–
पूर्वअर्थमन्त्री तथा नेकपा नेता भरतमोहन अधिकारीलाई मेडिसिटी हस्पिटलबाट ह्याम्स अस्पताल, धुम्बराहीमा सारिएको छ । करिब एक महिनादेखि मेडिसिटी हस्पिटल उपचाररत अधिकारीलाई ह्याम्स अस्पताल सारिएको हो ।
नेकपाका केन्द्रीय सदस्य सूर्य थापाका अनुसार उपचारबाट अपेक्षित लाभ नमिलेपछि ह्याम्स सारिएको हो । उनले मेडिसिटीमा अधिकारीको उपचारमा लापरबाही भएको आरोप लगाएका छन् । अहिले ह्याम्स अस्पतालमा अधिकारीको उपचारमा डा. भगवान कोइराला, डा. मनबहादुर केसी र डा. अर्जुन कार्की लगायत सहभागी छन् ।
नेता सामाजिक सञ्जाल मार्फत अधिकारीको उपचारको बारेमा जानकारी गराएका हुन् । उनले लेखेका छन्, ‘बितेको एक महिनाको अवधिलाई विचार गर्दा मेडिसिटीले उहाँको उपचारमा घोर लापरबाही र गैरजिम्मेवार रवैया प्रदर्शन गरेको अनुभूति जो कोहीलाई भएको छ’, उनले नेता अधिकारीलाई ह्याम्स सारिएको जानकारी दिँदै सामाजिक सञ्जालमा लेखेका छन् ।
अधिकारीको उपचार गराइरहँदा पनि अस्पतालले कुनै सूचना उपचार बुलेटिन ननिकालेको बताउँदै उनले प्रश्न गरेका छन्, ‘फोक्सोमा जमेको कफसमेत ननिकाली अस्पतालमा के उपचार गरिएको होला ?’
