काठमाडौं माघ, २८–
नेपाल विद्यार्थी संघ (नेविसंघ) को विषयमा पार्टी भित्रै विवाद उत्पन्न हुनथालेपछि नेविसंघका अध्यक्ष नैनसिंह महरले पदबाट राजीनामा दिने तयारी गरेका छन् । भातृसंस्थाको कारण माउ पार्टी नै विवादमा तानिन थालेपछि महरले यस्तो मनस्थिति बनाएको बुझिएको छ । अध्यक्ष महरले पार्टीका नेताहरुबाट आएको ‘प्रेसर’ थेग्न नसकेपछि आज दिउँसो पार्टी सभापति शेरबहादुर देउवालाई राजीनामा दिने तयारी गरेका छन् ।
कांग्रेस स्रोततका अनुसार नेविसंघकै विषयमा पार्टीभित्र नेताहरुका बीचमा ‘द्वन्द्व’ देखिएपछि उनले राजीनामा गरेर मार्गप्रसस्त गर्न खोजेका हुन् । स्रोतका अनुसार अध्यक्ष महर राजीनामाका लागि केन्द्रीय कार्यसमितिमा रहेका विद्यार्थी नेताहरुसँग छलफल गरिरहेका छन् ।
उनले आफू पदबाट राजीनामा दिने मनस्थितिमा रहेको र संगठन र पार्टीभित्र छलफल गरिरहेको प्रतिक्रिया दिएका छन् ।
यसअघि आइतबार पत्रकार सम्मेलन पछि कांग्रेस प्रवक्ता विश्वप्रकाश शर्माले नेविसंघको विवाद छिट्टै समाधान हुने प्रतिक्रिया दिएका थिए । ‘‘नेविसंघको विवाद टुंगिन्छ । सम्भवत यो विषयमा केन्द्रीय कार्यसमितिले निर्णय गर्नु पर्दैन होला, बाहिर नै समाधान हुन्छ,’ उनले घुमाउरो पारामा भनेका थिए ।
नेविसंघको विधान संशोधन गरेर थपिएको पाँच महिनाका समयावधी माघ २ गते पूरा भैसकेको थियो । तर पार्टीले माघ १० गते बस्ने केन्द्रीय कार्यसमितिले गर्ने निर्णय बमोजिम हुने गरी नेविसंघको केन्द्रीय कार्यसमितिलाई यथावत राखेको थियो । सम्भववतः आज बसीरहेको कांग्रेस केन्द्रीय समिति बैठकले नेविसंघका बारेमा निर्णय गर्न सक्ने अनुमान लगाईएको छ ।
