विराटनगर फागुन, २१–
राष्ट्रिय प्रजातन्त्र पार्टी (संयुक्त) का अध्यक्ष पशुपति शमशेर जबराले राजसंस्था सहितको प्रजातन्त्र र हिन्दू राष्ट्र स्थापना गर्ने उदघोष् गरेका छन् ।
मंगलबार विरटनगरमा प्रदेशस्तरीय भेलाबारे जानकारी दिन आयोजित पत्रकार सम्मेलनमा अध्यक्ष जवराले आन्दोलनबाटै राजसंस्था सहितको प्रजातन्त्र र हिन्दू राष्ट्र स्थापित गर्ने बताएका हुन् । उनले सबैलाई स्वीकार्य हुने राजसंस्था सहितको प्रजातन्त्र र सनातन हिन्दू राष्ट्रलाई लिएर संविधानप्रति आफ्नो असहमति रहेको बताए । यद्यपि, अध्यक्ष राणाले त्यहि संविधानको अधिकार प्रयोग गर्दै आन्दोलन गर्ने बताए ।
उनले भने, ‘संविधानले दिएको अधिकार उपयोग गर्दै, पार्टीको संगठन सुढृद गरेपछि हामी आन्दोलन गर्छौ । जनताको सहयोगबाटै हाम्रा मान्यता स्थापित गर्छौं ।’
संविधानमा केही राम्रा पक्षहरु भएको राणाको भनाइ छ । अध्यक्ष राणाले भने, ‘संविधान संशोधन गर्ने अधिकार दिइएको छ । यो संविधानको राम्रो पक्ष हो । यही व्यवस्थालाई टेकेर हामी राजसंस्था सहितको प्रजातन्त्र र सनातन हिन्दु राष्ट्र स्थापना गर्छौं ।’ सोही पत्रकार सम्मेलनमा बोल्दै अर्का अध्यक्ष डा. प्रकाशचन्द्र लोहनीले संविधानले दिएको हक उपयोग गर्दा कसैले थुन्न खोज्छ भने आफूहरु तयार रहेको बताए ।
