काठमाडौं फागुन, २६–
प्रतिनिधिसभाले टीकापुर घटनाको छानबिन गर्न गठित आयोगको प्रतिवेदन सार्वजनिक नहुनुको कारण संसदलाई जानकारी गराउन सरकारलाई निर्देशन दिएको छ ।
सभामुख कृष्णबहादुर महरालेआइतबारको प्रतिनिधिसभा बैठकमा उक्त घटनाको छानबिन गर्न सर्वोच्च अदालतका पूर्वन्यायाधीश गिरिशचन्द्र लालको नेतृत्वमा गठित आयोगको प्रतिवेदन किन सार्वजनिक नभएको हो भन्ने विषयमा जवाफ दिन सरकारलाई निर्देशन दिएका हुन् ।
आइतबारको बैठकमा राष्ट्रिय जनता पार्टी नेपालले लाल आयोगको प्रतिवेदन सार्वजनिक गर्न माग गर्दै संसद बैठक अवरोध गरेपछि सभामुख महराले सरकारलाई जवाफ दिन निर्देशन दिएका हुन् ।
राजपा अध्यक्ष मण्डलका संयोजक महेन्द्र राय यादवले सरकारले आफ्नो कमजोरी सार्वजनिक हुने डरले लाल आयोगको प्रतिवेदन सार्वजनिक नगरिएको आरोप लगाए । राजपाले उठाएको विषय गम्भीर र विशेष महत्वको रहेको र यसमा संसदको ध्यानाकर्षण भएको भन्दै सभामुख महराले यस विषयमा जवाफ दिन सरकारलाई निर्देशन दिएका हुन् ।
