काठमाडौं फागुन, २९–
सत्तारुढ दल नेपाल कम्युनिस्ट पार्टीका शीर्ष नेता माधवकुमार नेपालले विप्लव समूहमाथि लगाएको प्रतिबन्धको विरोध गरेका छन् । उनले पार्टीमा छलफल नै नगरेर विप्लव समूहमाथि प्रतिबन्ध लगाउनु उचित नभएको बताएका हुन् । बुधबार संसद भवन नयाँ वानेश्वरमा पत्रकारसँग कुरा गर्दै नेकपाको सचिवालय सदस्य समेत रहेका नेपालले यस्तो गम्भीर विषयमा पार्टीमा छलफललै नगरी निर्णय गरिएकोमा असन्तुष्टि प्रकट गरे ।
उनले भने, ‘पार्टीभित्र छलफल भएको छैन । पार्टीभित्र गम्भीर विषयमा छलफल हुनुपर्थ्यो ।’ नेता नेपालले थपे, ‘यस्तो चलन ठीक होइन, राष्ट्रिय महत्वका मेजर कदमहरु उठाउनुभन्दा पहिले बैठक बोलाउनुपर्छ, बैठकमा छलफल हुनुपर्छ, यस्तो किसिमको कार्यशैली उचित होइन ।’
सरकारमा गम्भीर तयारी गरेर र पर्याप्त छलफल गरेर भन्दा प्रचारात्मक कुरामा जाने प्रवृत्ति देखिएको नेता नेपालको भनाइ थियो । उनले भने, ‘कुनै पनि चिजको निम्ति राम्रो, गम्भीर तयारी गरेर, पर्याप्त छलफल गरेर सरोकार भएका ठाउँमा छलफल चलाएर कदम चाल्नुपर्ने हो, अपरिवक्व ढंगले निर्णय गरेको देखियो ।’
आफूहरुसँग छलफल नै नगरिएकाले यसमा सरकारलाई साथ दिन नसकिने नेता नेपालले बताए । ‘सरकारले सबै पक्ष सोचेरै गरेको होला भन्ने अनुमान गरौं’ उनले भने ‘सोधेपछि, सल्लाह गरेपछि अरुले पनि जिम्मा लिन्छन्, डिफेन्ड गर्छन् मौरीजस्तो जाइलाग्छन्, वास्तै गरिएन भने किन जिम्मा लिने ?’
