काठमाडौं फागुन, ३०–
नेत्रविक्रम चन्द ‘विप्लव’ नेतृत्वको नेकपाले सरकारले प्रतिबन्ध लगाएकोमा आक्रोश व्यक्त गरेको छ । उसले क्रान्तिका लागि चन्दा उठाउनु पार्टीको अधिकार भएको समेत प्रष्ट पारेको । सरकारले प्रतिबन्ध लगाएपछि पार्टीका महासचिव विप्लवले २८ फागुनमा विज्ञप्ति जारी गरेर उक्त कुरा बताएका हुन् । उनले जारी गरेको विज्ञप्तिमा भनिएको छ, सरकारले प्रतिबन्ध लगाउनु हास्यास्पद भएको भन्दै ‘ओली–बादल’ सत्तासँग नझुक्ने पार्टी कुनै पनि हालतमा झुक्ने छैन ।
विज्ञप्तिमा लेखिएको छ, ,‘हामीमाथिको कारबाहीको कारण प्रधानमन्त्री केपी ओलीले चन्दामा जोड्नु भनेको भ्रष्ट अनुहारलाई चोप्ने तुच्छ र उदाङ्गो खेल हो । हामी कुनै विदेशी केन्द्रबाट पैसा हसुरेका छैनौं ।’
सरकारसँग एकरती पनि नझुक्ने उल्लेख गरिएको विज्ञप्तिमा भनिएको छ,‘केपी ओली प्रचण्डलगायतको गद्दारीले क्रान्तिमा लाग्नैपर्ने बाध्यता आइलाग्यो । दमन भए त्यसको कडा प्रतिवाद गरिन्छ ।’
