काठमाडौं चैत, ५–
लामो विवादपछि नेपाली कांग्रेसको अनुशासन समिति शीर्ष तहमा सहमति जुटाएरै गठन गरिएको छ । सहमतिअनुसार नेता भीष्मराज आङ्दम्बेलाई समितिको संयोजक बनाइएको छ ।
पछिल्लो समय कांग्रेसभित्र अनुशासन समिति र निर्वाचन समिति गठनका विषयमा नेताहरुबीच विवाद रहँदै आएको थियो । तर, सोमबार अबेर बसेको बैठकमा अनुशासन समितिले गर्ने काम कारबाहीलाई सहमतिबाटै टुंगो लगाउने गरी नेताहरूबीच समिति गठनमा सहमति भएको हो । संयोजक चयन भएका आङ्दम्बे सभापति शेरबहादुर देउवा निकट मानिन्छन् ।
नेता अर्जुननरसिंह केसीले अनुशासन समितिले गर्ने काम कारबाही सहमतिबाटै गर्नेगरी शीर्ष तहमा सहमति भएपछि सर्वसम्मत रूपमा समिति गठन गरिएको जनाए ।
‘अनुशासन समितिले गर्ने काम कारबाही सहमतिबाटै हुनेगरी सर्वसम्मत रूपमा समिति गठन भएको छ, अब बहुमत र अल्पमतका आधारमा समितिले निर्णय गर्न पाउनेछैन,’ नेता केसीले राजधानीसँग भने ।
समितिका सदस्यहरूमा केन्द्रीय सदस्य किशोरसिंह राठौर र देवेन्द्रराज कँडेल चयन भएका छन् । उनीहरू सबै देउवा निकट मानिन्छन् । अन्य दुई सदस्यको नाम भने वरिष्ठ नेता रामचन्द्र पौडेल र नेता कृष्णप्रसाद सिटौलाले सभापतिलाई दिनेछन् ।
यसअघि अनुशासन समितिको संयोजकमा देउवानिकटकै नेता रमेश रिजाल थिए । तर, उनले गत निर्वाचनपछि चौतर्फी दबाबका कारण राजीनामा दिएका थिए ।
स्रोतका अनुसार सोमबारको बैठकमा सभापति देउवा पक्षका नेताहरूले नै सभापतिले सहमतिबाट अनुशासन समितिको काम कारबाही गर्ने भनी जनाएको सहमतिप्रति बैठकमा असन्तुष्टि जनाएका थिए । उनीहरूले सो शब्द नराख्न सभापतिलाई सुझाएका थिए ।
प्रवक्ता विश्वप्रकाश शर्माका अनुसार निर्वाचन समिति भने मंगलबारको बैठकले बनाउने र सो समितिसमेत सर्वसम्मत नै हुने उनले जनाए । स्रोतका अनुसार निर्वाचन समितिमा राधेश्याम अधिकारीलाई संयोजक बनाउने तयारी छ ।
सोमबार भएको सहमतिको मोडालिटी भने पूर्वमहामन्त्रीसमेत रहेका नेता सिटौलाले बनाएका हुन् । उनले अनुशासन समिति सहमतिकै आधारमा बन्नुपर्ने र सहमतिबाटै कामकारबाही गर्नुपर्ने भन्दै हरेकजसो बैठकमा धारणा राख्दै आएका थिए ।
त्यसपछि सिटौलासहित उपसभापति विमलेन्द्र निधि, महामन्त्री पूर्णबहादुर खड्का, नेताहरू अर्जुननरसिंह केसी बसेर यो सहमतिको मोडालिटी बनाएका थिए ।
संस्थापन पक्षले एकतर्फी रूपमा समिति गठनको प्रस्ताव ल्याउने तयारी गरेको भन्दै इतर पक्षले बैठक बहिष्कारको रणनीति बनाएपछि १४ फागुनका लागि बोलाइएको केन्द्रीय समिति स्थगित गरिएको थियो । त्यसयता आइतबार र सोमबार मात्रै दिनभरजसो शीर्ष तहमा सहमतिको प्रयास भएको थियो ।
