बुटवल वैशाख, ८–
नेपाली काँग्रेसका बरिष्ठ नेता रामचन्द्र पौडेललले वर्तमान कम्युनिष्ट सरकारले यति राम्रो सुनौलो समय गफ गरेर खेर फालेको आरोप लगाएका छन् । आइतबार रुपन्देही क्षेत्र नम्बर ३ को सम्मेलन उदघाटन गर्दै बरिष्ठ नेता पौडेलले सरकारको चर्को आलोचना गरेका हुन् ।
उनले अहिलेका सरकारका मानिसहरुले कांग्रेसले बनाएका संरचनामा फोटो खिच्ने काम भन्दा अर्को केही नगरेको आरोप लगाएका हुन् । उनले २०४८ सालमा आफूहरुलाई ज्ञानको कमी भए पनि जनताप्रति माया अगाध भएको भन्दै कम्युनिष्टहरुमा त्यो नदेखिएको बताए । आफूहरुले वीपीको नीति अनुसार गाँउलाई हेरेर विकास गर्न खोजेको तर, मओवादी जनयुद्धको नाममा विकास गर्न नपाईएको आरोप लगाए ।
नेता पौडेलले वर्तमान सरकारले विकासको प्राथमिकता छुट्टयाउन नसकेको बताउँदै उनले कम्युनिष्ट सरकारको नियत नै ठिक नभएको आरोप लगाए ।
उनले कम्युनिष्टहरुले देश र जनताको बारेमा नसोची केवल पार्टीको बारेमा मात्रै सोचेको आरोप लगाएका हुन् । उनले सरकारका क्रियाकलापहरुले पूर्णरुपमा सरकार असफल सावित भएको समेत दाबी गरे ।
वरिष्ठ नेता पौडेलले भने, ‘दुईतिहाई बहुमतको कम्युनिष्ट सरकारले सुनौलो अवसर पनि बर्बाद पार्यो ।’ सरकार सत्ता र कार्यकर्ताको लागि प्रयोग भएको उनको आरोप थियो ।
उनले सरकारसँग नयाँ योजना तथा कार्यक्रम नभएको र एक वर्षमा जनतालाई अन्यौलमा राख्ने बाहेक अरु केही गर्न नसकेको बताए । वर्तमान सरकार कुहिरोमा हराएको काग जस्तै भएको उल्लेख गर्दै नेता पौडेलले जनताको हित र संविधानको रक्षाका लागि काँग्रेसले सहि कदम चाल्नुपर्नेमा जोड दिए ।