काठमाडौं वैशाख, १०–
भारतमा लोकसभा निर्वाचनको तेस्रो चरणको मतदान मंगलवार भइरहेको छ । लोकसभाको ११७ सीटका लागि विभिन्न राज्यमा मतदान भइरहेको हो ।
प्रधानमन्त्री नरेन्द्र मोदीले गुजरातको रानिप मतदान केन्द्रमा मतदान गरेका छन् । मतदान गर्नुअघि उनले गान्धीनगरमा आफ्नी आमा हीराबेनसँग भेटघाट गरे । त्यसक्रममा उनले आमाको गोडा छोएर आशीर्वाद लिए ।
आमाले मोदीलाई आशीर्वादस्वरूप एउटा नरिवल, मिश्री र ५०० भारु दिइन् ।
आमाको आशीर्वाद लिएपछि मोदीले खुला जीपमा चढेर मतदान केन्द्र पुगेर मतदान गरे । प्रधानमन्त्री मोदीले उनकी ९० वर्षीया आमा हीराबेन मोदी सगै गुजरातको अहमदाबादमा मतदान गरेका छन् । प्रधानमन्त्री मोदीले अहमदाबादको रनिप क्षेत्रको निशान उच्च माध्यमिक विद्यालयको मतदान केन्द्रमा मतदान गरेका हुन् ।
गुजरात पुग्दा प्रधानमन्त्री मोदी आमालाई अवश्य भेट्छन् । उनी आफ्नी आमाको निकै नजिक छन् ।
गान्धीनगर लोकसभा सीटबाट भाजपा राष्ट्रिय अध्यक्ष अमित शाह चुनाव लडिरहेका छन् ।
मतदान गरेपछि प्रधानमन्त्री मोदीले भने, ‘कुम्भको मेलामा स्नान गर्दा पवित्रता अनुभव भएजस्तै लोकतन्त्रको महापर्वमा भोट दिँदा पवित्रताको अनुभव गरिरहेको छु ।’
प्रधानमन्त्री मोदीले मानिसहरूलाई भोट गर्न अपील समेत गरे । एजेन्सी
