काठमाडौं वैशाख, १८–
मजदुर दिवसको अवसरमा कांग्रेस सभापति शेरबहादुर देउवाले देश तथा विदेशमा रहेका सम्पूर्ण नेपाली मजदुरहरुमा शुभकामना व्यक्त गरेका छन् ।
बुधबार १३० औं मजदुर दिवसको अवसरमा एक शुभकामना सन्देश जारी गर्दै देउवाले शुभकामना व्यक्त गरेका हुन् ।
पूर्वप्रधानमन्त्री समेत रहेका सभापति देउवाले शुभकामना सन्देशमा विश्व र नेपालको श्रमिक आन्दोलन स्मरण गर्दै कांग्रेस नेतृत्वमा भएको विराटनगरको मजदुर आन्दोलनको चर्चा गरेका छन् ।
उनले लेखेका छन्, ‘विराटनगर मजदुर आन्दोलनका क्रममा जननायक बीपी कोइरालालगायत धेरै नेताहरुलाई पक्राउ गरेको थियो । नेपालमा प्रजातन्त्रको स्थापना अथवा २००७ को ऐतिहासिक जनक्रान्तिको प्रस्थान विन्दु यही मजदुर आन्दोलन थियो । ’ सभापति देउवाले कांग्रेस नेतृत्वको मजदुर आन्दोलनको प्रशंसा समेत गरेका छन् ।
२०१६ मा नेपाली कांग्रेसको जन–निर्वाचित सरकारले नै कारखाना र मजदूरसम्बन्धी कानूनको तर्जुमा गरेर, मजदूरहरुलाई कानूनसम्मत् अधिकार प्रदान गरेको स्मरण पनि देउवाले आफ्नो शुभकामना सन्देशमा गराएका छन् ।
नेपाली श्रमिक अझै पनि अनेक समस्यामा रहेकाले उनीहरुको हक, हित सुरक्षाका लागि कांग्रेसले साथ दिने प्रतिबद्धता देउवाले जनाएका छन् ।
