काठमाडौं वैशाख, २३–
नेपाली कांग्रेसका सांसद गगन थापाले सरकारलाई ‘समृद्ध नेपाल सुखी नेपाली’ को नारा परिवर्तन गर्न सुझाव दिएका छन् । सोमबार प्रतिनिधिसभाको बैठकमा बोल्दै कांग्रेस नेता समेत रहेका थापाले ‘समृद्ध नेपाल सुखी नेपाली’ सट्टा ‘समृद्ध दमक, सुखी केपी ओली’ भन्ने नारा राख्न सुझाव दिएका हुन् । उनले प्रधानमन्त्रीको लेटरप्याड प्रयोग गरि आफ्नो निर्वाचन क्षेत्रको लागि सिफारिस गरिएका योजनाहरुको फेहरिस्तका सन्दर्भमा उक्त कुरा बताएका हुन् । सरकारको नीति तथा कार्यक्रम अलमलिएको निबन्ध जस्तो भएको सांसद थापाको भनाइ छ । महत्वाकांक्षाविहीन, अभिलाशा शून्य सपनारहित नीति तथा कार्यक्रमले सरकारले सपना देख्ने क्षमता पनि राखेको छैन भन्ने देखाएको सांसद थापाको भनाइ थियो ।
उनले कार्यपालिका, व्यवस्थापिका, न्यायपालिका, अख्तियार, मानवअधिकारआयोग लगायत संवैधानिक निकायलाई पेल्ने काम गरेको सरकारले एक वर्षमा कुनै पनि उपलब्धि हासिल गर्न नसकेर आत्मप्रसंम्सामा मात्रै अल्झिएको टिप्पणी गरे ।
सरकारले राष्ट्रपतिलाई उक्साएर विवादमा ल्याउने काम गरेको भन्दै नीति तथा कार्यक्रम सम्बोधनका क्रममा प्रयोग गरिएको मेरो सरकार प्रति पनि उनले गम्भिर आपत्ति जनाए ।
