सहरी विकास मन्त्री प्रभु साह चढेको गाडीले सर्लाहीको हरिवनमा एक पैदल यात्रुलाई ठक्कर दिएर भागेको छ ।
पूर्वपश्चिम राजमार्गको हरिवनमा मन्त्री साह चढेको ना १ झ ३८४२ नं. को गाडीले ठक्कर दिँदा लालबन्दी नगरपालिका वडा नम्बर ८ चन्द्रपुरका अन्दाजी ३५ बर्षीय बच्चु तामाङ घाइते भएका हुन् ।
गाडीको ठक्करबाट घाइते भएका तामाङको नमुना अस्पताल हरिवनमा उपचार भइरहेको सर्लाहीका प्रहरी प्रमुख सन्तोष सिंह राठौरले बताए। राठौरले मन्त्री साह चढेको जीपले पैदल यात्रुलाई ठक्कर दिएको बताए । ‘मन्त्री ज्यू चढेको जीपले ठक्कर दिएको रहेछ’, राठौरले भने, ‘दुर्घटनाबारे माथि जाहेर गरिसक्यौं,कम्मर र खुट्टामा चोट लागेका घाइतेको हरिवनमा उपचार भईरहेको छ ।’ घाइते तामाङको कम्मर र खुट्टामा सामान्य चोट लागेको छ ।
जीपले पौने १२ बजेतिर पैदल यात्रुलाई ठक्कर दिएको हो । मुलुकको मन्त्री जस्तो जिम्मेवारीमा रहेको व्यक्तिले दुर्घटना पश्चात घाईतेको उद्धार लगायतमा सहभागि हुनुको सट्टा फरार भएर मानवीय संवेदना समेत नदेखाएको भन्दै स्थानीय आक्रोशित बनेका छन् ।ु
